भांगरभूंय | प्रतिनिधी
अभाविपची शिक्षण खात्या कडेन मागणी
पणजी: गोंयच्या उच्च माध्यमीक विद्यालयां कडल्यान प्रवेश प्रक्रिये मजगतीं ‘प्रोस्पेक्टस’च्या नांवा खाला जी अनधिकृत शुल्क वसुली सुरू आसा, ताचो अखील भारतीय विद्यार्थी परिशद (अभाविप) खर शब्दांनी निशेध करता. विद्यार्थ्यां कडल्यान प्रोस्पेक्टसच्या नांवा खाला जो भरपूर शुल्क वसूल करतात, ताचे आड अभाविपान आतां आक्रमक भुमिका घेतल्या.
हे प्रक्रियेंत सुटसुटीतपणां हाडपा खातीर अभाविपान शिक्षणमंत्री आनी शिक्षण संचालकांकडेन सकयल दिल्ले दोन पर्याय सुचयल्यात:
जशीं खुबशीं विद्यालयां आपली म्हायती पुस्तिका ऑनलायन प्रसिद्ध करतात, तेच फाटभूंयेर उच्च माध्यमीक विद्यालयांनी प्रोस्पेक्टस पीडीएफ स्वरुपांत वेबसायटीचेर फुकट उपलब्ध करून दिवचे. तशेंच जर छापणावळीचो खर्च सक्तीचो आसल्यार, खंयचेय परिस्थितींत प्रोस्पेक्टसची किंमत १०० रुपयां परस चड आसची न्हय.
जे तरेन महाविद्यालयां प्रवेशाच्या वेळार प्रोस्पेक्टस फुकट दिवपाचेर भर दितात, तशेंच धोरण उच्च माध्यमीक विद्यालयांनीय चालीक लावचें. शिक्षण विभागान सरकारी निर्णय काडून प्रोस्पेक्टस खातीर चडांत चड १०० रुपयांची मर्यादा दवरची. छापिल्ल्यो प्रती घेवपाची सक्ती करिनासतना ऑनलायन फुकट डावनलोडाची सुविधा दिवची. ज्यो शाळा चड शुल्क घेतात तांचेर बेगोबेग कारवाय करची. तशेंच ज्या विद्यार्थ्यांनी प्रवेशा खातीर अशे तरेचे प्रोस्पेक्टस तितल्या तितले शुल्क दिवन घेतल्यात अश्या विद्यार्थ्यांक पयशे परत करचें.
अभावीप कोंकण प्रांत सहमंत्री, यश कंटक हांच्या म्हणण्या प्रमाण, कांय विद्यालयां फुकट म्हायती पुस्तिका दितात. जाल्यार कांय सुवातांचेर १००० रुपयां मेरेन लुटमार करतात. अशें करप अन्याय. म्हायती पुस्तिका हें फायद्याचें साधन न्हय. ती फकत म्हायती दिवपी पुस्तिका. जर विद्यार्थ्यांक लुकसाण करपी ही वसुली बंद जावंक ना आनी शुल्काचेर मर्यादा येवंक ना, जाल्यार विद्यार्थी आनी पालकांच्या बर्या खातीर खर आंदोलन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
