भांगरभूंय | प्रतिनिधी
पणजी : मडगांवच्या इएसआय हॉस्पिटलान एमटीएम कर्मचार्यांची कापून घेतिल्ली ४ लाख ७९ हजार ६११ रुपया ग्रॅच्युइटी रक्कम परत करपाची शिफारस मानवाधिकार आयोगान केली. हे विशीं आयोगान हॉस्पिटलाच्या विमा वैजकी अधिकार्यांक ६० दिसांची मुदत दिली. मुदतींतली रक्कम परतिना जाल्यार ८ टक्के वर्सुकी व्याजदर दिवचो पडटलो. हे विशीं केल्ले कारवायेचो अहवाल २६ जून २०२६ पयलीं दिवपाची सुचवणी आयोगान केल्या. हे विशीं टिओटोनियो परेरा हांणी मार्च २०२६त आयोगाकडेन कागाळ केल्ली. हातूंत तांणी आपली ग्रॅच्युइटी रक्कम चुकीचे पद्धतीन कापून घेतिल्ल्याचें म्हणिल्लें.
आयोगाच्या अहवालांत म्हणलां, कागाळदार सरकारी खात्यांतले एमटीएस म्हणून २८ फेब्रुवारी २०२५ दिसा निवृत्त जाले. ह्या वेळार तांणी ३१ वर्सां परस चड सेवा केल्ली. तांची वेतन पडताळणी करतना वेतन निश्चितींत कांय त्रुटी आशिल्ल्याचें लेखा खात्यान नमूद केल्लें. ते प्रमाण कागाळदाराच्या ग्रॅच्युइटींतल्यान ४ लाख ७९ हजार ६११ रुपया कापून घेतले. जाल्यार मार्च २०२५त तांकां उरिल्ले ५ लाख ५० हजार ५९७ रुपया ग्रॅच्युइटी रक्कम दिली. सर्वोच्च न्यायालयान पंजाब राज्य आड रफिक मसिह आनी केरळ राज्य आड थॉमस डॅनियल ह्या दोनूय प्रकरणांनी अशे तरेन रक्कम कापून घेवप चुकीचें आशिल्ल्याचो निवाडो दिल्लो.
तशेंच जोतिबा माळी आड गोंय सरकार ह्या प्रकरणांत गोंयच्या मुंबय उच्च न्यायालयान अतिरिक्त वेतन दिवप हीय कागाळदाराची न्हय, तर सरकारी खात्याची चूक आशिल्ल्याचें म्हणिल्लें. हाका लागून कागाळदारा कडल्यान अतिरिक्त वेतन वसूल करचें न्हय असो आदेश न्यायालयान दिल्लो. परेरा प्रकरणांत तांचे चुकीक लागून वा फटींग म्हायतीक लागून तांणी अतिरिक्त रक्कम दिल्ली अशें इ एस आय कार्यालयान म्हणूंक ना. गट ’क’तल्या कर्मचार्या कडल्यान केल्ली वसुली अन्यायी, खर वा मनमानी स्वरूपाची आसल्यार, हाका लागून मानवाधिकाराचे नेम मोडिल्ल्याचें निरीक्षण आयोगान नोंद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
