भांगरभूंय | प्रतिनिधी
पणजीः बांदकाम खात्याचे कामगार सोसायटी खाला कंत्राटी कर्मचार्यांक सासणा खातीर सेवेंत आस्पावन घेवपाची मागणी सरकारान पुराय करची. हे मागणेक नेट धरपा खातीर सोसायटीचे कर्मचारी कामगार दिसा निमतान १ मेक आझाद मैदानाचेर धरणें धरतले, अशी शिटकावणी इन्टकचे अध्यक्ष अजय प्रभुगांवकार हांणी दिल्या.
कामगार सोसायटीच्या कर्मचार्यांनी पणजे आल्तिनार बांदकाम खात्याच्या प्रधान मुखेल अभियंत्याक निवेदन भेटयलें.उपरांत ते उलयताले.
कामगार सोसायटी खाला जे कर्मचारी कामार आसात तांचे विशय अजूनय सरकारान सुटावे करूंक नात. तांकां कंत्राटी पद्धतीचेर दवरून सरकारान तांकां फटयल्यात, असो आरोप प्रभुगांवकार हांणी केला.
कितलींशींच वर्सां दिसवड्याचेर काम केले उपरांत आंदोलन सुरू करतकच तांकां पांच वर्सां पयलीं तात्पुरते पध्दतीचेर आसपावन घेवन ६वें वेतन आयोग लागू केलें. मात सरकार नियमीत करतलो आशी तांकां अपेक्षा आसली. ह्या काळांत २०२४ त सर्वोच्च न्यायालयान आदेश काडून स्पश्ट केला की कामगाराची पिडणूक सरकारान करची न्हय. आमचे मागणे प्रमाण तांकां समान वेतन दिवप, तांची उदरगत करप आनी नियमीत पध्दतीचो रोजगार सरकारान दिवंक जाय अशें न्यायालयान नमुद केलां, अशी म्हायती प्रभुगांवकार हांणी दिली.
लोकहिता खातीर सरकार ह्या प्रकरणाची स्वेच्छा दखल घेतली अशी अपेक्षा आसली. जर सोसायटी खाला नोंदणी आशिल्ल्याचें तांत्रीक कारणांक लागून जर तांकां नियमीत करप शक्य ना जाल्यार, तांकां नियमीत कर्मचार्यां भशेन समान वेतन सरकारान दितले अशी आमची अपेक्षा आशिल्ली. हे सोसायटीचे कामागार बिलींगाचें काम करतात, कारकून, डेटा एन्ट्री ओपरेटर म्हण काम करतात. तांकां ६ वें आयोग मेळटा. मात हेंच काम करपी नियमीत कामगारांक ७ व्या आयोगाचो वेतन मेळटा, अशें प्रभुगांवकार हांणी म्हणलें.
हे भशेनचो भेदभाव करिनासतना सर्वोच्च न्यायालयाचे आदेश सरकारान वेवस्थीत समजून घेवचो आनी तांचेर कितलींशींच वर्सां अन्याय जाला तो पयस करचो. कांय कामगार २३ वर्सां जालीं कंत्राटी पध्दतीचेरूच आशिल्ल्यान ते नियमीत कर्मचार्या भशेन काम करतात. आतां आमचें पाशिंयेंस काबार जाल्ल्या कारणान १४ एप्रिलाक एक सभा घेवन कांय निर्णय घेतले, अशें प्रभुगांवकार हांणी सांगलें.
हे फाटभूंयेर आमी प्रधान मुखेल अभियंत्याक निवेदन भेटयलां. हाची प्रत भौशीक बांदकाम मंत्र्याक दितले. निशेध म्हण आमी १ मेक आझाद मैदानाचेर धरणें आंदोलन करपाचें थारयलां. आमी कोणाकूच त्रास दिनासतना जो आमचेर अन्याय जाला ताचो निशेध करतले. सरकार वा कोणाच्याच विरोधात कसलीच घोशणा दिनासतना मुक मोर्चा आमी घडोवन हाडटले, अशी शिटकावणी प्रभुगांवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
