भांगरभूंय | प्रतिनिधी
३९ (अ) विरोधांतल्या आंदोलना वेळार मंत्री राणे हांच्या घरा भायर केल्लीं निदर्शनां
पणजी : वादग्रस्त ३९ (अ) विरोधांतल्या आंदोलना मजगतीं नगरनियोजनमंत्री विश्वजीत राणे हांच्या घरा भायर निदर्शनां केल्ल्या प्रकरणांत विरोधी पक्ष फुडारी युरी आलेमाव हांकां पणजी पुलिसांचो समन्स.
विरोधी पक्ष फुडारी युरी आलेमाव हांकां सोमारा दनपरां ४ वरांचेर पणजी पुलीस स्टेशनांत हाजीर रावपाक समन्सा वरवीं सांगलें.
गोंयांत कांय दिसां फाटीं नगरनियोजन खात्यांतल्या ३९ (अ) कलमा आड व्हड आंदोलन केल्लें. आमदार वीरेश बोरकार हांणी हें आंदोलन सुरू केल्लें. उपरांत पणजेच्या आझाद मैदानार हें आंदोलन सुरू आशिल्लें आनी ताका वाडपी प्रतिसाद मेळिल्लो. उपरांत तांतल्या कांय आंदोलनकांनी मंत्री विश्वजीत राणे हांच्या मिरामारच्या घरा कडेन मोर्चा व्हेल्लो. हातूंत लोक व्हडा संख्येन वाटेकार जाल्ले. हातूंत विरोधी पक्ष फुडारी युरी आलेमाव हांचे सयत हेर विरोधी आमदार, फुडारी वाटेकार जाल्ले.
ह्या प्रकरणांत पुलिसांनी युरी आलेमाव आनी हेरां आड गुन्यांव नोंद केल्लो. आतां ह्या प्रकरणांत चौकशी खातीर पुलिसांनी तांकां समन्स धाडले. भारतीय नागरीक सुरक्षा संहितेच्या कलम ३९ (अ) खाला तांकां आयज दनपरां ४ वरांचेर पणजी पुलीस स्टेशनांत हाजीर रावपा खातीर समन्स धाडल्यात.
#39A #Summons #PanjimPoliceStation #Goa #YuriAlemao #BNSS
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
