भांगरभूंय | प्रतिनिधी
पणजी: गोंयचो पर्यावरणाचेर आधारिल्लो लघुपट ‘द अवेकनिंग’ची फ्रॉम इंटरनॅशनल क्लायमेट फिल्म फेस्टिव्हल २०२६ खातीर अधिकृतपणान निवड जाल्या. हो फेस्टिव्हल १७ मे २०२६ दिसा युकेंतल्या फ्रॉम हांगा चीज आनी ग्रेन थिएटरांत जावपाचो आसा.
अंदूं पांचवे आवृत्तीक पाविल्लो हो फेस्टिव्हल ‘बियॉन्ड इन्स्पायर्ड: टुगेदर वी आर चेंजिंग द वर्ल्ड’ हे थिमे खाला आयोजीत केला. अंदूं १८० परस व्हडल्या देशांतल्यान १,०२१ नोंदण्यां मदल्या २८७ चित्रपटांची निवड जाल्या.
ह्या चित्रपटांत रमिझ शेख, सिया चोडणकार आनी सायरस फर्नांडीस मुखेल भुमिकेंत आसात. ही कथा नुमैर खान, रमिझ शेख आनी शर्वी धोंड हांणी बरयल्या. जाल्यार पटकथा आनी छायांकन नुमैर खान हांणी पळयलां. एडिटिंग वरुण कश्यप हांणी केलां. जाल्यार तांत्रीक मदत बोस्कोन स्टुडिओ हांणी दिली. पार्श्वसंगीत सायरस फर्नांडीस हांणी तयार केलां आनी निर्मिती वेवस्थापन शर्वी धोंड आनी एबेनेझर राजामनिक्कम हांणी केलां.
हो चित्रपट २१ वर्सां पिरायेचो रमिझ शेख हांणी दिग्दर्शीत केला. ताणें आपल्या प्रवासाची सुरवात इल्यूमिनेट ह्या प्रकल्पांत सहाय्यक दिग्दर्शक आनी अभिनेता म्हूण केल्ली. त्या उपरांत ताणें ‘द अवेकनिंग’ दिग्दर्शित केलो, जाका डॉन बॉस्को ग्लोबल यूथ फिल्म फेस्टिव्हलांत पयल्याच निवडींत सावथ एशियन रीजनल अवॉर्ड मेळ्ळो.
ह्या चित्रपटाची ही दुसरी आंतरराष्ट्रीय निवड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
