फोटोपत्रकार रघु राय संवसाराक अंतरले

भांगरभूंय | प्रतिनिधी

नामनेचे फोटोपत्रकार रघु राय आयतारा 83 वर्सांचे पिरायेर संवसाराक अंतरले. तांकां एका खाजगी हॉस्पिटलांत भरती केल्लें. तांचे पूत फोटोग्राफर नितीन राय हांणी आपल्या बाबाक कॅन्सर जावन मरण आयिल्ल्याचें सांगलें.
राय भारताचे एक खूब लोकप्रीय फोटोग्राफर आशिल्ले, जांच्या कॅमेऱ्यान भारताचे विंगड-विंगड रंग टिपले. 1980 च्या दशकांत ‘इंडिया टुडे’ मासिका खातीर ताणीं केल्लें काम खूब प्रभावी थारलें.
राय हांच्या फाटल्यान तांची घरकान्न गुरमीत, पूत नितीन आनी धुवो लगन, अवनी आनी पुर्वाई असो परिवार आसा.
रघु राय हांणी 1965 वर्सा, 23 वर्सांचे पिरायेर फोटोग्राफीक सुरवात केली. एका वर्सा उपरांत, 1966 त, ते ‘द स्टेट्समन’ दिसाळ्यांत मुखेल फोटोग्राफर म्हूण रुजू जाले आनी थंय सुमार धा वर्सां काम केलें. त्या उपरांत कोलकात्याच्या एका सातोळ्यांत ताणीं ‘पिक्चर एडिटर’ म्हूण काम पळयलें.
1971 वर्सा, तांचें काम नामनेचे फोटोग्राफर हेन्री कार्टियर ब्रेसों हांचे नदरेक पडलें, जाणीं उपरांत राय हांचें नांव ‘मॅग्नम फोटोज’ खातीर सुचयले, जी संवसारांतली सगल्यांत मानाची फोटोग्राफर संस्था मानतात.
1972 त, तांकां भारताचो चवथो श्रेश्ठ नागरी पुरस्कार ‘पद्मश्री’ दिवन सन्मानीत केलें. 1971 च्या भारत-पाक झुजा वेळार ताणीं टिपिल्लीं छायाचित्रां, बांगलादेशी निर्वासितांची परिस्थिती आनी झुजांत पाकिस्तानान केल्ली शरणागती, ह्या तांच्या मोलादीक कामा खातीर हो भोवमान तांकां मेळ्ळो.
सुमार धा वर्सां उपरांत, 1982 त ताणीं ‘इंडिया टुडे’ मासिकांत पिक्चर एडिटर, व्हिज्युअलायझर आनी फोटोग्राफर म्हूण काम सुरू केलें, जो तांच्या कारकिर्दींतलो एक नवो टप्पो आशिल्लो.
1992 वर्सा, ‘नॅशनल जिओग्राफिक’ मासिकातल्या ‘ह्युमन मॅनेजमेंट ऑफ वाइल्डलाईफ इन इंडिया’ ह्या विशयाचेर केल्ल्या कामा खातीर तांकां अमेरिकेंत ‘फोटोग्राफर ऑफ द इयर’ हो पुरस्कार फावो जालो. संवसारांतल्या जायत्या व्हड मासिकांनी आनी दिसाळ्यांनी राय हांच्यो फोटो स्टोरीज उजवाडायल्यात. भोपाळ गॅस दुर्घटने वयलो तांचो एक फोटो संवसारांत गाजिल्लो. मरण येतकच पुरिल्ले एक सान चलयचें मुखामळ, तिका पुरतना तिचे तकले वयलो बापायचो हात हो तो फोटो. सोशल मिडियाचेर चडशे कडेन तो ब्लर केल्लो दिसता.