भांगरभूंय | प्रतिनिधी
वाळपय: एके वटेन वताची खराय आनी वाडत वचपी उश्णताय, दुसरे वटेन सत्तरी तालुक्याच्या ११ गांवांनी उदकाचो खर उणाव जाल्ल्यान नागरिकांक बरेच त्रास सोंसचे पडटात. सध्या ह्या गांवांक टँकरांतल्यान उदकाची पुरवण चालू आसा. मात हें उदक अपुर्ण आनी समाधानकारक नाशिल्ल्यान गांवांतल्या लोकांनी तिडक उक्तायल्या. फुडाराचो उणाव लक्षांत दवरून उदकाचें योग्य वेवस्थापन आनी गरजेचे उपाय करपाची मागणी सध्या वाडत आसा.
दाबोस प्रकल्प पुराय तांकीन चलता, तरी लेगीत उदकाचो उणाव
सध्या ह्या म्हालांतलो दाबोस उदका प्रकल्प पुराय तांकीन चलता आनी ताका कसलेच तरेचो तांत्रीक इबाडूय जावंक ना. मात उश्णतायेक लागून उदकाची मागणी खूब वाडल्या. ह्या म्हालांतल्या पयसुल्ल्या गांवांनी उदकाचो दाब पावना म्हणून त्या वाठारांत हो उणाव जाणवता, अशें उदका पुरवण खात्याचे अधिकारी सांगतात. सत्तरी तालुक्यांतल्या दाबोस, पोडोशें, केरी, सावड्डें आनी गुळेली अश्या विवीध सुवातांनी उदक शुध्दीकरण प्रकल्प चालीक लायले तरी उणावाची समस्या कायम आसता. नियोजनाचो उणाव आनी सुरवाती सावन हो प्रस्न गंभीरतायेन घेवंक नाशिल्ल्यान हो वेळ आयिल्ल्याचो आरोप गांवकार करतात.
टँकरार निंबून आशिल्ले गांव
सत्तरींतल्या सुमार ११ गांवांक सध्या टँकरा वरवीं उदकाची पुरवण जाता. हातूंत मुखेलपणान झरमे, दाबे, चरवणे, हिवरे, मावस ह्या गांवांचो आसपाव आसा. झरमे गांवांत उदक पावपा खातीर दाबेंच्या जलकुंभाचो वापर जाता. मात थंयचो पंप सेगीत इबाडिल्ल्यान झरमे गांवच्या उदकाचे पुरवणेचे परिणाम जाता. दाबें आनी म्हाऊस गांवांतूय उदकाचो गंभीर प्रस्न निर्माण जाला. हांगां टँकरा शिवाय पर्याय उरूंक ना.
असमाधानी पुरवण आनी नागरिकांचो राग
सत्तरींतल्या दरेका गांवाक २४ वरां उदक दिवपाचें उतर सरकारान दिल्लें. मात प्रत्यक्षांत जायत्या गांवांक फकत २ ते ३ वरां उदक मेळटा. हाचो परिणाम नागरिकांचे दिसपट्टे जिणेचेर जावपाक लागला. उदका पुरवण फावो त्या प्रमाणांत नाशिल्ल्यान वाळपायच्या उदका पुरवण कार्यालयांतय निशेध वाडल्यात. नागरीकांच्यो कागाळी दिसान दीस वाडत आसात आनी प्रशासनाचेर चेंपण येवपाक लागलां.
दाबोस प्रकल्पाची तांक वाडोवपाची गरज
सत्तरींतल्या ५० परस चड गांवांक उदका पुरवण करपी दाबोस प्रकल्पाची सध्याची तांक १५ एमएलडी आसा. वाडत वचपी लोकसंख्या आनी उदकाची मागणी मतींत घेतल्यार ही तांक अपुर्ण जायत आसा. फुडाराच्यो गरजो वळखून ह्या प्रकल्पाची तांक वाडोवप वा हेर कडेन उण्यांत उणें ५० एमएलडी तांक आशिल्लो नवो प्रकल्प स्थापन करप गरजेचें आसा. तेन्नाच सत्तरीचो उदकाचो उणाव कायमचे सुटावो जावंक शकता अशें नागरीकांनी मत मांडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
