भांगरभूंय | प्रतिनिधी
मराल- कुलूंत दोंगरा वयल्या एका घरांत लिपिल्लो
पणजीः वास्को जाल्ले भौशीक कार्यावळींत सेंट फ्रांसीस झेवियर विशीं आक्षेपार्ह विधानां करून धर्मीक वायटपण निर्माण करपी दुबावीत गौतम खट्टराक निमाणें गोंय पुलिसांनी अटक केल्या. हिमाचल प्रदेशांतल्या कुल्लू जिल्ह्यांतल्यान अटक केले उपरांत गोंय गुन्यांव फांट्याचे निरिक्षक परेश नायक, पुलीस उपनिरिक्षक माधव नायक आनी हवालदार नवीन पालयेंकार हांच्या पंगडान आयतारा दनपरां तीन दिसांच्या ट्रांझिट रिमांडाचेर गौतम खट्टराक मोपा विमानतळार हाडलो. आतां ताका रायबंदरच्या गुन्यांव फांट्यांत हाडला. कुल्लू, हैदराबाद आनी उपरांत गोंय असो प्रवास करून पुलीस पंगड दुबाविताक घेवन गोंयांत पावले.
गोंयांतल्यान पळून गेले उपरांत गौतम खट्टर पुलिसांक सेगीत भुलयतालो. तो हिमाचल प्रदेशांतल्या कुल्लू जिल्ह्यांतल्या मराल हांगच्या एका दोंगरार श्री नीळकंठ देवळाच्या वाठारांत एका घरांत आलाशिरो घेवन राविल्ल्याची म्हायती पुलिसांक मेळ्ळी. पुलिसांक ताचे विशीं कळ्ळां हें ताका समजतांच तांणी थंयच्यान पळून वचपाचो यत्न केलो. मात हिमाचल पुलिसांनी मरालांतल्या चेक पोस्टाचेर सांपळो घालून ताचे गाडये वांगडा ताका अटक केली. ताचे गाडयेच्या म्हायती वेल्यान गोंय क्रायम ब्र्रांचान हिमाचल पुलिसांचे मजतीन २४ एप्रिलाक सांजेवेळार ही कारवाय केली.
उत्तराखंड ते हिमाचल प्रदेश असो सेगीत फाटलाव केलो.
गौतमान आपलो मोबायल बंद दवरिल्ल्यान तो खंय आसा हें सोदप कठीण जाल्लें. मात तांत्रीक तपास आनी गुपीत म्हायतीच्या आदारार पुलिसांनी ताचें स्थान निश्चीत केलें. तो परदेशांत पळून वपाची शक्यताय आशिल्ल्यान ताचे आड ह्यान पयलींच ’लूक आऊट नोटीस’ आनी अजामीनपात्र वारंट जारी केल्ली.
मजगतीं, ह्या प्रकरणाचो तपास सुरवातेक वास्को पुलिसांकडेन आशिल्लो. मात हे विशींची खराय वळखून गुन्यांव फांट्या कडेन (क्रायम ब्रांच) वर्ग केलो. ह्या तपासांत अशें समजलें, गौतमाचो भाव माधव खट्टर हांणीच हे कार्यावळीचें नियोजन केल्लें आनी आक्षेपार्ह भाशणूय तांणीच बरोवन दिल्लें. हे खातीर तांणी आयोजकां कडल्यान ५१ हजार रुपया आनी लॉजिस्टीक वेवस्थाय घेतिल्ली. पुलिसांनी माधवाक पयलींच हरिद्वारांतल्यान अटक करून गोंयांत हाडला.
मजगतीं, बिरेस्तारा माधवाक वास्को न्यायालयांत हाजीर केलो. न्यायालयान ताका ४ दिसांची पुलीस बंदखण दिली. आयज तांची बंदखण सोंपता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
