भांगरभूंय | प्रतिनिधी
म्हापशें : मुरगांव, वास्कोचे एका भौशीक कार्यावळींत सेंट फ्रान्सीस झेवियर हांचे विशीं आक्षेपार्ह आनी द्वेशपूर्ण विधान करपी गौतम खट्टर हाका गोंय पुलिशेच्या गुन्यांव फांट्यान हिमाचल प्रदेशांत थळाव्या पुलिसांचे मजतीन अटक केल्या. ट्रान्झीट रिमांडाचेर खट्टर हाका आयज 26 एप्रीलाक गोंयांत हाडटले.
शुक्रारा 24 एप्रीलाक सांजे वेळार गुन्यांव फांट्याच्या पंगडान दुबावीत खट्टर हाचे मोटारीचे म्हायती वयल्यान हिमाचल प्रदेश पुलिशेचे मजतीन कुल्लू जिल्ह्यांतल्या मराल गांवांतल्यान ताब्यांत घेतिल्लो. नीळकंठ मंदीर मठांतल्यान ताका ताब्यांत घेतिल्लो. उपरांत साईंग पुलीस स्टेशनांत प्रतिबंधक कार्यवाही खाला ताका अटक केल्ली.
दुबाविताक अटक जाताच शुक्रारा रातींच पुलीस निरिक्षक परेश नायक हांच्या फुडारपणा खाला उपनिरिक्षक माधव नायक, हवालदार नवीन पालयेंकार आनी हेर गुन्यांव फांट्याचो पंगड हिमाचल प्रदेशांत गेल्लो. ह्या पंगडान शेनवारा दुबावीत खट्टर हाका ताब्यांत घेवन अटक केली. ते उपरांत साईंग कुल्लू प्रथमश्रेणी न्यायालया कडल्यान ट्रान्झीट रिमांड घेवन दुबाविताक घेवन गोंया येवपाक भायर सरले. रातचो 5 वरां गाडयेन आनी उपरांत आयतारा सकाळीं चंदीगडांतल्यान विमान मार्गान हो पंगड गोंया येवपाक भायर ससतलो. दनपारां वा सांजे उसरां हो पंगड गोंयांत पावतलो.
मजगतीं, दुबावीत गौतम खट्टर हाणें वास्को परशुराम जयंती निमतान आयोजीत केल्ले कार्यावळींत सेंट झेवियर हांचे विशीं आक्षेप घेवपा सारकें विधान केल्लें. ह्या प्रकरणांत वास्को पुलीस उपनिरिक्षक डेव्हीड कॉस्ता हांणी खट्टर हाचे आड गुन्यांव दाखल करून तपास सुरू केलो. गौतम गोंयांतल्यान मूळ गांवांत गेल्ल्याचें मुखार आयले उपरांत वास्को पुलिशेचो पंगड गौतम खट्टर हाका सोदपाक उत्तराखंडाक गेल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
