भांगरभूंय | प्रतिनिधी
10 वर्सांनी 10 टक्क्यांनी वाड
भांगरभूंय । प्रतिनिधी
पणजी : फाटल्या कांय वर्सांत बाळटेरां खातीर सरकारी हॉस्पिटलांक अदीक पसंती दितात. वर्सां प्रमाण पळयत जाल्यार सरकारी हॉस्पिटलांत बाळंत जावपाचें प्रमाण वाडत आसा. जाल्यार खाजगी हॉस्पिटलांतलें हें प्रमाण उणें जालां. 2015 त गोंयांत जाल्ल्या वट्ट बाळटेरां मदलें 55.14 टक्के सरकारी हॉस्पिटलांत जाल्यार 39.47 खाजगी हॉस्पिटलांत जाल्लीं. 2024 त सरकारी हॉस्पिटलांतल्या बाळटेरांचें प्रमाण वाडून 72.62 टक्के जालें, जाल्यार खाजगी हॉस्पिटलांतलें बाळटेराचें प्रमाण 27 टक्क्यां मेरेन जालां. सवाय दरांत बऱ्यो सुविधा उपलब्ध जाल्ल्यान सरकारी हॉस्पिटलांतलें बाळटेरांचें प्रमाण वाडलां.
सांख्यिकी आनी मुल्यमापन खात्यान जारी केल्ल्या अहवाला प्रमाण 2015 ते 2024 ह्या 10 वर्सांच्या काळांत गोंयांत वट्ट 1 लाख 88 हजार 755 भुरगीं जल्माक आयिल्लीं. तातूंतलीं 1 लाख 9 हजार 68 भुरगीं (57 टक्के) सरकारी, जाल्यार 74 हजार 510 भुरगीं (39.47 टक्के) खाजगी हॉस्पिटलांत जल्माक आयिल्लीं. सरकारी वा खाजगी सोडून गोंयांत हेर नर्स वा परंपरीक दायी वा हेर व्यक्तींचे हाजिरेंत बाळंत जावपाचें प्रमाण लेगीत उणें जालां. 2015 त हें प्रमाण 4.60 टक्के आशिल्लें. 2024 त तें उणें जावन फकत 0.33 टक्के जाल्ल्याचें अहवालांत नमूद केलां.
गोंयांतल्या ग्रामीण वाठारांत सरकारी हॉस्पिटलांत प्राधान्य दिवपाचें प्रमाण चड आसा. 2015 त ग्रामीण वाठारांत जाल्ल्या वट्ट बाळटेरां मदलीं 18 टक्के खाजगी, 77 टक्के सरकारी जाल्यार 5 टक्के हेर परंपरीक पद्दतीन जाल्लीं. 2024 त ग्रामीण वाठारांतल्या वट्ट बाळटेरां मदलीं 13 टक्के खाजगी जाल्यार 87 टक्के सरकारी हॉस्पिटलांत जाल्लीं. 2015 ते 2024 मेरेन शारी वाठारांत खाजगी हॉस्पिटलांचे तुळेंत सरकारी हॉस्पिटलांतलें बाळटेरांचें प्रमाण लेगीत चड आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
