भांगरभूंय | प्रतिनिधी
भावंडांनो,
ह्या सप्तकाच्या मदेका सावन तुमकां उबाळाच्या माया म्हयन्याची सुटी पडटली. तुमी सगलीं जाणां उमळशिकेन, उमेदीन वाट पळयतात. हांव जाणां. तुमच्यांतल्या कांय भावंडांनी तुमच्या आवडट्या मामागेर, मावशेगेर, काकागेर वचपाचीं सपनां येवजिल्यांत न्हय? केन्ना शुक्रार उजवाडटलो आनी आमकां सुटी पडटली अशें तुमकां जालां. कांय जाणां तर तुमची आवडटी भावंडां, जीं पयसुल्ल्या गांवांनी रावतात तीं तुमगेर येवपाची वाट पळयतात. तीं तुमगेर आयलीं वा तुमी तांगेर गेलीं म्हणटकच केन्नाच्यान तुमी येवजून दवरिल्ले प्रकल्प, कामांक वा खेळाक वेळ दिवन ती पुराय करून तातूंतल्यान तुमची मनरिजवण करून घेतलीं म्हूण रावल्यांत. मनरिजवणे वांगडाच तुमी जायत्यो गजाली शिकपा खातीर संकल्प बाळगिल्ल्यान ते पुराय करपाक वावरूंक लागतलीं न्हय?
भावंडांनो, तुमच्या जाण्टेल्यांनी म्हाका कळयलां, तुमी सुटयेचे दीस कशे तरेन वांटपाचे येवजिलां तें. तुमच्या भावंडांच्या शाळांनी, हय, आनी तुमच्याय बी शाळांनी गिमाळीं शिबिरां, कार्यशाळा, हेर कार्यावळी दवरल्यात. तातूंत तुमी वांटेकार जावपाचीं आसात. भावंडांनो बरें दिसलें आयकून. तुमी गिमाळें सुटयेंतल्या शिबिरांनी, कार्यशाळांनी जावं ती खेळाची, सांस्कृतीक वा शिक्षणीक शिबिरां, पूण तुमी वांटो घेतात तें आयकून म्हज्या जिवाक बरें दिसलें. खोस जाली. कारण तुमी तुमची सुटी फुकट घालयनात म्हूण.
खरें सांगूं भावंडांनो, तुमी शिबिरांनी वांटेकार जातकूच तातूंतल्यान खूब बऱ्यो गजाली शिकूंक पावतलीं. तशेंच तुमच्या आंगांतल्या सुप्त गुणांक उर्बा मेळटली. तुमचे कलेक आनीक आकार मेळटलो. वाडीकय लागतली. तातूंतल्यान तुमी तुमच्या घरच्यांक, इश्ट- इश्टिणींक भोंवतणच्यांक एक वेगळोच आनंद दिवंक पावतलीं. भोंवतणच्यांची मनरिजवण बरे तरेन करूंक पावतलीं. इतलेंच न्हय तर तातूंतल्यान तुमकां खूब खोस मेळटली. जिची तुळा संवसारांतल्या हेर खंयच्याच गजाली कडेन करूंक जावची ना. हय भावंडांनो.
कलेंतल्यान जो आनंद तुमी हेरांक दितात वा जी खोस तुमी अणभवतात ती खोस संवसारांतली सर्वश्रेश्ठ आसा. दुबळेकायेच्या दिसांनी तीच तुमकां तारता. खोशी दवरता. फुडाराक धाडसान फुडो करपाचें बळगें तुमकां दिता. जीं आव्हानां तुमच्या शिक्षणीक मळार उप्रासतात तांकां फुडो करपाक हे कलेंत मेळयिल्लें जैत तुमकां आदार दिता. तें जैत तुमच्यांतलो आत्मविस्वास घटमूट करता.
भावंडांनो, हीं शिबिरां, कार्यशाळा तुमच्यांतली शिस्त वाडीक लायता. तुमची इश्टागत वाडीक लायता. त्या इश्ट- इश्टिणींच्या सांगातान फुडली वाट चलपाक एक वेगळोच आदार मेळटा. त्याच आदारा वरवीं तुमका आव्हानात्मक आशिल्लीं कामां सोंपे रितीन करूंक संद मेळटा. सांघीकपण घडून येवन तुमच्यातली एकवटाची वणत घटमूट जाता. एकवटाक लागून तुमचे भितरलो भंय, भीड मुर्वत पयस जाता. शिबिरांतल्यान, कार्यशाळांतल्यान तुमी सशक्त आनी सक्षम जातात. जी गजाल तुमच्या पालकांक अभिमानाची थारता.
देखूनच म्हणटां भावंडांनो, सुटयेच्या दिसांनी शिबिरांचो, कार्यशाळांचो लाव घेयात आं. ही सुटी तुमकां खोशयेची, आनी उर्बादेणी आंवडेतां उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
