भांगरभूंय | प्रतिनिधी
मानकुराद हांव, एकदम गोड. जालो भुरगो बोटां चोकून खाता. आंब्यापसून जायते फायदे आसतात, आंब्याचो ज्युस, लोणचें, हालवो, मिठायी, आईस्क्रीम, पापड करतात.
अारे बाबा, तूं खंय वयता? हय हांव उलो करतां तुका, म्हाका पळय तरी! खंय पळयता? आयकुपाक येना दिसता. कडकडीत वत येयलें की म्हाका सोदीत भोंवात. हय हांव आसा. एक मोयें आंब्याचें झाड. खूब दीस जाले, म्हजो एक खांदो मोडपाक पावला. दुखता म्हाका. कोण आदार पसून दिना. येतात, तुमी तोरां कितलीं आसा ती मेजतात आनी वतात. म्हाजो एक खांदो मोडला तें कोण पळयना.
हे तोंडां फुडें घर आसा पळय, तेंच्यांनी म्हाका ल्हान आसतना हाडलेलो. थंय एक मनीस आसलो झाडांचो खूब मोगी, तेची भुरगीं म्हाका उदक घालतालीं. भुरगीं सरभोंवतणीं खेळटालीं. बायल केन्ना केन्ना येताली उदक घालूंक. कपडे सुकोवपाक म्हाज्या भोंवतणी दोरी बांदताली. करता करता भुरगीं व्हड जालीं, कामाक गेलीं. तो जाण्टो जालो तरी तसोच तो म्हाजी कुयदाद घेतालो.
आतां खबर ना, तो दिश्टी पडना. आतां भुरगीं येना. आंबो आसा की ना पळयतात, वतात. सकाळची काय तीं नासता घरा कडेन कामाक वतात. हांव आसा आपलो रस्त्या कुशीक. मागीर लोक कोणूय फातर मारून आंबो उडयतात. आयज जर तो जाण्टेलो आशिल्लो जाल्यार म्हाजी कुयदाद घेवपाचो, खांद्याक आदार दिवपाचो.
मागीर तुमीच पावसांत म्हण्टलीं, खांदो पडलो रस्त्यार आनी रस्तो बंद जालो. बरो जिव आसताना सवकासायेन काडिनात तुमी. मागीर बोवाळ मारुंक फुडें. तुमकां आंबे खावपाक गावले की जाले, बेश्टो सादो आंबो न्हू हां. मानकुराद हांव, एकदम गोड. जालो भुरगो पसून बोटां चोखून खाता. आंब्या पसून जायते फायदे आसतात, आंब्याचो ज्युस, लोणचें, हालवो, मिठाय, आयस्क्रीम, पापड करतात. फकत फळ दिना, तुमचें देवकार्य आसलें की येतात तुमी बडी घेवन आंब्याचे ताळो काडपाक. म्हजो तुमकांच आदार जायना, तर सुकणीं म्हजेर घोंटेर करतात, उमेदीन रावतात. तशीच जनावरां येता बसतात, न्हिदतात. माकड जाल्यार आंबो खातात, पाडो उडयतात आनी वतात. पाड्यां पसून मागीर दुसरो आंबो जाता.
थोडे लोक सावळेक सांजे येवन बसतात गजाली सांगतात, तर केन्ना केन्ना भुरग्याक खेळपाक हाडटात. भुरग्यांक घेवन सांजे झाडाच्या सावळेक बसतात. भुरगीं खेळटात, बायलां बसून सांगतात गजाली, कितें रांदलें, जेवलें, हो टीव्ही प्रोग्राम पळयलो? अशें आनी तशें जालें करून, पूण म्हाका कोण पळयना. एक एकदां म्हाका भंय दिसता, तुमी सकयल बसतात, तेन्ना म्हाजो खांदो तुमचेर तकलेर पडल्यार किते जातलें? जाणा तुमी?
तेन्ना म्हाका बडबडूं नाका हां, खांद्याच्या जाग्यार आंबो पडलो जाल्यार बडबडचीं ना. आंबो घेवन धांवतलीं. तोरां काडपाक येता तेन्ना तुमी म्हाजेर फातर मारून मारून म्हाका दुखयतात, तोर पडलें की मीठ-मसालो मारून खातात, तुमी खावपाचो आवाज केलो की म्हाका कळटा, तुमकां म्हजें तोर आवडलें, तशे तुमी आंबेय खातात, मिटक्यो मारून.
बाजारांत आंबे खूब आयले . म्हारग जाल्यात, तुमकां खावपाक कठीण केलां. आतां म्हजो आंबो खालो की, बीं म्हणजे पारो रुजत घाल, म्हणजे दुसरो आंबो तयार जातलो. भरपूर उदक घाल, मागीर खाया ताव मारीत. तुमी जाणां हांव फळांचो राजा! आनी गरमी येयली की हांव बाजारांत येवन बसलेलों दिसतां, पिंवळे, हळडुळे, तांबडे, पांचवे आनी नारंगी रंगान नटलेलों आसता. तेन्ना तुमकां रूच येता. तेन्ना कितले पयशे दितात आनी घेतात. पण झाड लाय म्हण सांगता तेन्ना तुमी लायनात. फकत झाड लायल्यार तुमकां कितलो फायदो आसा! तुमची भलायकी फळां खावन बरी जाता. झाडाक लागून तुमकां पावस बरो येता. आमकां लागून तर तुमकां फायदोच फायदो, लुकसाण ना.
बऱ्यो गजाली खूब जाल्यो, आतां मात्सो तुमचे कडेन वेळ आसा जाल्यार म्हाजो मात्सो हो खांदो काडा, ना जाल्यार आदार दियात तेका. फाल्यां वाऱ्यान कोणाचेर पडलो जाल्यार म्हाका बडबडूं नाकात हां, यो तर बेगीन, म्हाका आदार दियात.
नेहा नंदेश गोवेकार
9527725874
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
