भांगरभूंय | प्रतिनिधी
‘गांथन विचारांची’ म्हळ्यार लेखिकेचे जिणेंत आयिल्ले कांय प्रसंग आनी समाजांत घोळपी विचार करुंक लावपी कांय विशयांचेर लेखिकेन केल्लें भाश्य.
कोंकणींत हालींसराक बरीं बरीं कसदार पुश्टीक पुस्तकां येत आसात. ललीत लेखनाचें दालन तर दिश्ट लागपा इतलें तरतरून येवपाक लागलां.
‘गांथन विचारांची’ हें सौ. नीमा विजयकुमार शेणवी आमोणकार हांचें ललित लेखांचें- निबंदांचें पुस्तक हालींच उजवाडाक आयलां. सौ. नीमा शेणवी आमोणकार ह्यो एक सिद्धहस्त मराठी लेखिका. तांचीं कांय मराठी कथांची आनी लेखांचीं पुस्तकां उजवाडाक आयल्यांत. ‘गांथन विचारांची’ हें तांचे पयलेंच कोंकणी पुस्तक. तें कसाक उतरलां. घसघशीत अशें हें पुस्तक.
‘गांथन विचारांची’ म्हळ्यार लेखिकेचे जिणेंत आयिल्ले कांय प्रसंग आनी समाजांत घोळपी विचार करुंक लावपी कांय विशयांचेर लेखिकेन केल्लें भाश्य. वयलेचाराक पळयल्यार हे विशय सादे दिसले तरी ते आमच्या जिणेचे वेगळांवक जायना आशिल्ले वांटे जावन आसात.
ह्या पुस्तकांत अशे 30 निबंद आसात. ह्या निबंदांचे माथाळे, हें परिक्षण वाचप्यांच्या नदरेखाला हाडीनशे दिसले. ‘जड जालें वजें’, ‘मायेचो लेप’, ‘उश्णें वायण’, ‘गोजडी’ , ‘पदर’, ‘जनेल’, ‘पुरुमेंत’, ‘पेटूल’, झोपाळो आदी.
दिसपट्टे जिणेंत खेळपी हे विशय. ह्या विशयांचेर लेखिकेन केल्लें मार्मिक भाश्य म्हाका खूप आवडलें. सामकी सुटसुटीत भास, कसलेच तरेचें अडेचें अवडंबर ना. पाल्हाळ ना, नेमके केल्लें विशयाचें विश्लेशण अशे हे निबंद. हालींसराक मेक-अप करून लेपोड सारयल्लें अती अलंकारीक बरप खूब खेपे दिसता. पूण लेखिकेक सादेपण आवडटा. वाचकांकूय तेंच आवडटा. विशय जरी सादे दिसले तरी लेखिकेन काडिल्ले निश्कर्श खूप मोलादीक आसात. ते विचारांक चालना दितात. कारण जीण येता तेन्ना ताचे वांगडा टीव्ही फ्रीज हांचे सारके युजर्स मॅन्युएल येना. म्हायती पुस्तिका आमचे फाटीक दसून येना. अणभवान शिकूं येता. लेखिकेचे चरचरीत भेदक अणभव आमकां शाणेपण शिकोवन वता.
मोस्त्रा खातीर म्हाका कांय आवडिल्ल्या निबंदांचेर थोडें विस्तारान बरयनशें दिसलें. देखीक ‘मायेचो लेप’ ह्या निबंदांत घरांत जमा जाल्या पोरण्या वस्तूंचेर कसो जीव जडटा आनी त्यो भायर उडोवंक आमचो जीव कसो वयर सकयल जाता ताचेर उजवाड घाला. निबंदांत लेखिका निमणे कडेन म्हण्टा, ‘आपल्याकडेन आशिल्ल्यो आपले आवडिच्यो वस्तू निमणे कडेन हांगाच दवरून आमकां वचचें पडटलें हाची जाण आसूऩ सुद्धां इल्ल्या इल्ल्या गजालींचो मोग सुटना हें खरें. आमचो जीव, काळीज तांतूत़ गुंथिल्लें आसता’. कितली खरी गजाल ही. ही आसक्ती सामकी वायट हें आध्यात्मिक सत लेखिका सहज सांगून वता. मनीस पुंजायत आसता. कसलीच पोटली वांगडा व्हरूंक पावना.
‘गोजडी’ हो निबंद म्हाका खूब आवडलो. गोज़डी ही म्हजी सामकी आवडीची. रजय, चादर, ब्लेंकेट्स आदी न्हिदतना वापरपाच्यो कितल्योय म्हारग वस्तू आसल्यो तरी गोज़डी ही सगळ्या गोंयकारांची आवडीची. ह्या गोजडेंत आवयच्या मायेची उब आसता. संस्कृतीचें एक पांगरूण आसता.
ह्या निबंदांत लेखिका निमणेकडेन म्हण्टा, ‘केन्ना केन्ना म्हज्या मनांत विचार येतालो, अमेरिके सारक्या फ़ुडारिल्ल्या देसांत रुम़ हिटर, ब्लेंकेट्स सारक्या वस्तूं फ़ुडें गोजडी बाबडी कोनशाक़ पडल्या आसतली. पूण म्हजो दुबाव फ़ट थारलो. एक दीस इश्टिणीचो फ़ोन आयलो. आपल्या धुवेच्या बांयटेराक अमेरिकेंत वचपी म्हज्या इश्टिणीन नव्या माणकुल्या खातीर आपल्या पोरण्या साडयांचो ल्हानशो मोवसार गोजड्यो शिंवुन घेतिल्ल्यो’. गोजडेची ही परंपरा मुखार आनी तिवूय बी साता समुद्रा पेल्यान वता हें पळोवन लेखिकेक खोस जाता.
‘जनेल’ हो आनीक एक लेख म्हाका खूप आवडलो. ह्या निबंदांत निमणे कडेन लेखिकेन केल्लें भाश्य म्हाका खूब आवडलें. ती बरयता, सतत दुसऱ्यांच्यो चुकी सोदपांत गुंथिल्ल्या मनांचें, काळजाचें जनेल नितळ करपाची शिकवण जनेलाकडल्यान मेळटा. भायलें, भितरलें पळोवपाची तजवीज जनेलाक आसता. अशेंच जर मनशाच्या मनांक काळजाक जनेल आशिल्लें जाल्यार कितलें बरें जातलें आशिल्लें. खरें, फ़ट, वायट बरें, कुट कारस्थानां उजवाडाक येतलीं आसलीं. खरेंच मनांक जनेल आसूंक जाय आशिल्लें. कितलीं सत उतरां हीं. जनेलां फिल्टर म्हळ्यार गाळणी कशीं आदार करपाचीं.
ह्या पुस्तकाक कवियत्री नुतन साखरदांडे हांणी अभ्यासपुर्ण प्रस्तावना बरयल्या. कोंकणींत निबंदकारांची बरीच व्हडली परंपरा आसा. तातूंत आतां सौ. नीमा शेणवी आमोणकाराचो आसपाव जाला. तांचे कडल्यान अश्याच अभ्यासपूर्ण निबंदांची सातत्यान अपेक्षा आसा. हें पुस्तक संजना पब्लिकेशन्सान उजवाडाक हाडलां. तांकांय परबीं दिवंकूच जाय.
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
