दोन भुरग्यांक बुडून मरण

भांगरभूंय | प्रतिनिधी

वज्रें – भाटपाल, काणकोणचे न्हंयेंत दुर्घटणा

घरच्यांक सांगिनासतना आयिल्लीं न्हावपाक

बांदाच्यो फळयो काडिल्ल्यान वाडिल्लें उदक

भांगरभूंय । प्रतिनिधी

पणजी : वज्रें- भाटपाल, काणकोणां दोगां माणकुल्या भुरग्यांक न्हंयेंत बुडून मरण आयलें. ह्या दोगांतलो एकलो मावशेच्या घरा रावपाक आयिल्लो. हे दुर्दैवी घडणुकेक लागून वाठारांत दुख्ख पातळ्ळां.

मेळिल्ले म्हायती प्रमाण, तीन ल्हान भुरगे घरां सांगिनासतना न्हंयेचेर न्हांवपाक आयिल्ले. बांदाच्यो फळयो काडिल्ल्यान उदक वाडिल्लें. तांकां उदकाचो अदमास येवंक ना. दोग जाण बुडले. आठ वर्सांचो एकलो वयरूच राविल्लो. ते दोग जाण बुडले हें कळटकूच तांणे धांवत घरां येवन घरच्यांक ही म्हायती दिली.

ध्रुव उदय वड्डार (7, रावपी नवें वाडें) आनी ऋत्विक धनंजय नायक (11, रावपी कारवार) अशीं बुडिल्ल्यांचीं नांवां आसात. शाळेक सुटी पडिल्ल्यान ऋत्विक हो आपले मावशेच्या घरा रावपाक आयिल्लो. ताच्या मावशान ताका काल नंदनगदा ताच्या घरा पावयता अशें सांगिल्लें, पूण ऋत्विकान आपूण आनीक दोन दीस रावता अशें सांगलें.

भुरगे बुडिल्ल्याची म्हायती मेळटाच काणकोण उजो पालोवपी दळ घडणूक सुवातेर पावलो. उपरांत दोनूय भुरग्यांक भायर काडले. पूण ते मेरेन तांकां मरण आयिल्लें. दोगांयच्यो कुडी काणकोणच्या सरकारी समाजीक भलायकी केंद्रांत व्हेल्यो. उपरांत दक्षीण गोंय जिल्हो हॉस्पिटलांत पोस्टमार्टमा खातीर धाडल्यो.

मजगतीं, थळाव्यां कडल्यान कळटा ते म्हायती प्रमाण वज्रे बांदाच्यो फळयो पयर काडिल्ल्यो. ताका लागून उदकाचो प्रवाह चड आशिल्लो. म्हणून ते बुडले आसूं येतात, असो अदमास थळाव्यांनी उक्तायला.

म्हयन्यांभरांत 11 बुडले, 13 जाणांक मरण

एप्रीलांत उदकांत बुडपाच्यो 11 घडणुको घडल्यो. तातूंत 13 जाणांक मरण आयलें. ह्या घडणुकां मदीं तीन अश्यो घडणुको आसात, जातूंत एकाच वांगडा दोग जाणांक मरण आयलां. सगल्यांत चड बुडपाच्यो 3 घडणुको ह्या म्हयन्याच्या तिसऱ्या सप्तकांत नोंद जाल्यात. वट्ट मरण आयिल्ल्यां मदीं तीन मरणाच्यो घडणुको आत्महत्या म्हूण नोंद जाल्यात.

2 एप्रीलाक रेवोडेंच्या शापोरा न्हंयेच्या पात्रांत नुस्तें मारपाक गेल्ल्या थॉमस फर्नांडीस (35. रा. तरमास तळर्ण, पेडणें) हो बुडिल्लो. ताचो रातीं उसरां मेरेन सोद लागूंक नाशिल्लो.

6 एप्रीलाक खांडेपारच्या नव्या पुला वयल्यान संजना संजीव गावडे (45. रा. कुंकळ्ये वेलींग) हिणें दुदसागर न्हंयेंत उडी मारली. गंभीर अवस्थेंत तिका पुलिसांनी उदका भायर काडली आनी हॉस्पिटलांत दाखल केल्ली. पूण सांजेच्या 4 वरांच्या सुमाराक जीएमसींत उपचार चालू आसतना तिका मरण आयिल्लें.

10 एप्रीलाक पाडेली- सत्तरी पुला वयल्यान उडी मारिल्ल्यान वाळपयच्या शिंपणावळ खात्यांत काम करपी कनिश्ठ अभियंतो अझिझ शहा (59. रा. वाळपय) हाका मरण आयिल्लें.

13 एप्रीलाक भिरोंडें पंचायतीच्या फाटले वटेन आशिल्ले न्हंयेंत इश्टां सयत न्हावपा खातीर देंविल्ल्या गोवा वेल्हाच्या रजत काणकोणकार (21) हाका बुडून मरण आयिल्लें.

14 एप्रीलाक कोलवाळे तिळारीच्या कानालांत पडून प्रतीश जाधव (28) हाका बुडून मरण आयिल्लें. ताची कूड तीन माड सडयें वाठारांत सांपडली. त्याच दिसा वस्तवाडो कुडचड्यां आपल्या कुटुंबियां सयत खणगिणी- बेतूल वाठारांत न्हावपा खातीर व्हाळांत देंविल्ल्या श्लोक नायक (10) ह्या भावाक बुडटना वाटावपाक गेल्ली सानिका नायक (17) हे भयणीक उपचारा वेळार मरण आयलें.

16 एप्रीलाक शिरगांवचे श्रीदेवी लयराईचे जात्रे खातीर सोंवळें धरिल्ल्या दामोदर उर्फ अभिषेक दलपत नायक (23. रा. काजीवाडा, विठ्ठलापूर- सांखळी) ह्या धोंडाक वाठादेवच्या दिवचल न्हंयेंत बुडून मरण आयलें. सकाळीं न्हावपा खातीर आनी कपडे भिजोवपा खातीर तो उदकांत देंविल्लो. जंय तो उबो आशिल्लो थंय उदकाची पातळी उणी आशिल्ली, मात अचकीत ताका फीट आयिल्ल्यान तो थेट उदकांत पडलो.

18 एप्रीलाक माशें कराईचे अरविंद प्रभू (77) हांणी ताच्या घरा लागसारचे बांयंत उडी मारून आत्महत्या केली. काणकोण उजो पालोवपी दळाच्या कर्मचाऱ्यांनी ताची कूड भायर काडली. त्याच दिसा गुडी- पाड्ड्यां एका खडी क्रशर कामगाराच्या 10 म्हयन्यांच्या भुरग्याक विराज वडार बादलेंत उदकांत बुचकळून मरण आयलें. ताचे पालक मूळ कर्नाटकांतले आसात.

20 एप्रीलाक बोब्रीमोड्डी- केप्यां साळावली मुख्य कानालांत सांजे वेळार न्हावपाक देंविल्ल्या दोन तरणाट्यांक बुडून मरण आयलें. मरण आयिल्ले इग्नेशियस फर्नाडिस (24, रा. फातोडी) आनी ताचो इश्ट हरजीत सिंग दानू (रा. उतोड्डें, मूळ उत्तराखंड) हे दोगूय माजोड्ड्यां एका पांच नखेत्री हॉटेलांत कामाक आशिल्ले. काल 25 एप्रीलाक भाटपाल- न्यूवाडो (धुपेमळ) वाठारांतल्या वज्रे न्हंयेंत न्हावपाक गेल्ल्या ऋत्विक नायक (11) आनी ध्रुव वद्दार (7) ह्या दोन ल्हान भुरग्यांक खोल उदकांत बुडून मरण आयलें.