भांगरभूंय | प्रतिनिधी
मुख्यमंत्री : कामाचे सुवातेर सुरक्षा आसप गरजेचें
भांगरभूंय । प्रतिनिधी
पणजी : सृदृढ मनीसबळ ही घटमूट अर्थवेवस्थेची बुन्याद आसा. कामगारां खातीर सुरक्षितता सुनिश्चीत करप गरजेचें आसा. ताका लागून ते आत्मविस्वासान काम करपाक शकतले. गोंयांतल्या उद्देग तशेंच हेर मळांनी कामाचे सुवातेर भलायकी, सुरक्षेक प्राधान्य दिवप गरजेचें आसा. हे खातीर सरकार गरजेची ती सगली मजत करता. ही सामुहीक जापसालदारकी आसा, अशें मुख्यमंत्री डॉ. प्रमोद सावंत हांणी सांगलें.
शेनवारा पणजे असोसिएशन ऑफ ऑक्युपेशनल हेल्थ (एओएच) गोंय वतीन आयोजीत कार्यावळींत मुख्यमंत्री उलयताले. ह्या वेळार संजय आमोणकार, शिवानंद पांगम, डॉ. विश्वराज माशेलकार, डॉ. धर्मेश पारीख आनी हेर पदाधिकारी हाजीर आशिल्ले.
मुख्यमंत्र्यान सांगलें, एओएच ही संस्था वैजकी तशेंच उद्देग मळा वयलो म्हत्वाचो दुवो आसा. सध्या गतीन बदलपी उद्देगीक संवसारांत ही संस्था म्हत्वाचें काम करता. उदरगतींत मुळाव्यो सुविधा, गुंतवणूक हांचो विचार करतात, पूम ह्या सगळ्यांच्या म्हत्वाचे सुवातेर आसपी म्हत्वाचो घटक म्हणल्यार नागरीक आसा.
कारखान्या पसून कार्यालयां मेरेन, बांदकाम थळां पसून प्रयोगशाळां मेरेन, कामाचे खंयचेय सुवातेर सुरक्षितता सुनिश्चीत करप ही एक सामुदायीक जापसालदारकी आसा. राज्य सरकार उद्देगीक सुरक्षा घटमूट करचे खातीर पुराय बांदील आसा. सरकार उद्देगांतलीं उपकरणां सुरक्षा मानकां प्रमाण आशिल्ल्याची खात्री करप, प्रतिबंधात्मक भलायकी सेवा पद्दतींक उर्बा दिवप, प्रशिक्षण आनी जागरुकता उपक्रमांक तेंको दिवप, अशीं कामां करता. उद्देग सर्वोच्च सुरक्षा मानकां सयत कार्यरत उरतलो हाची आमी खात्री दितात, अशें मुख्यमंत्र्यान सांगलें. हे संघटणेक लागून वैजकी, वेवसायीक, उद्देगीक तज्ञ आनी सरकारी अधिकारी एकठांय एके माचयेर आयल्यात. सुरक्षीत, टिकावू आनी फुडारा खातीर सज्ज कामाची सुवात तयार करपा खातीर हें सहकार्य म्हत्वाचें आसा. गोंयांतल्या हेर उददेगांनी लेगीत एओएच सारक्या संस्थे वांगडा सक्रीयपणान वांटो घेवप गरजेचें आसा. उद्देगांनी सर्वोत्कृश्ट पद्दती आत्मसात करून भलायकी आनी सुरक्षा उपायां मदीं गुंतवणूक करची. विकसीत भारत आनी गोंया खातीर कामाचे सुवातेर सुरक्षा आसप गरजेचें आसा, अशेंय मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
