भांगरभूंय | प्रतिनिधी
भांगरभूंय । प्रतिनिधी
पणजीः राष्ट्रीय गिरायक हॅल्पलायन वेबसायटीचेर फाटल्या तीन वर्साच्या काळांत गोंय सावन 10 हजार परस चड कागाळी नोंद जाल्यात. ह्या तीन वर्साच्या काळांत कागाळीची नोंद करपाचे प्रमाण 47 टक्के मेरेन वाडला, अशी म्हायती केंद्रीय गिरायक वेवहार मंत्रालयान दिल्या.
मंत्रालयान दिल्ले म्हायती प्रमाण, राष्ट्रीय गिरायक हॅल्पलयान ही वेबसायट गिरायक वेवहार खात्यान जागृताय निर्माण करपाक, सल्लो दिवपाक आनी गिरायकांच्या कागाळींचें निवारण करपा खातीर सुरू केल्या.
खात्यान गिरायक, केंद्र आनी राज्य सरकारच्यो एजन्सी, खाजगी कंपनी, नियामक, लोकपाल आनी कॉल सेंटरां सारख्या सगळ्या घटकांक एकाच माचयेर हाडपा खातीर हें पोर्टल एक एकीकृत कागाळ निवारण यंत्रणा म्हूण सुरू केलां. हें पोर्टल गिरायकां मदीं तांच्या हक्कांची राखण करपा खातीर आनी तांच्या जापसालदारकीं विशीं म्हायती दिवन जागृताय निर्माण करपाकय मजत करता. गिरायक ह्या पोर्टलाच्या माध्यमांतल्यान आपल्यो कागाळी ऑनलायन नोंद करूंक शकतात.
हें वेब पोर्टल न्यायालयीन खटल्या पयलींच्या पांवड्यार एक पर्यायी वाद निवारण यंत्रणा आसा. जर गिरायकाचें समाधान जाले ना, जाल्यार तो योग्य गिरायक आयोगा कडेन संपर्क करुं शकता. तशेंच गिरायक आपल्या कागाळीची स्थिती वेबसायटीचेर तपासपाक शकता.
वर्स 2023 ते 2025 ह्या काळांत 10,797 कागाळी नोंद जाल्यात. फाटल्या तीन वर्साच्या काळांत कागाळींत सेगीत वाड जायत आसा. वर्स 2023त 2980 कागाळींची नोंद जाल्ली, 2024त हातूंत वाड जावन कागाळी 3415 मेरेन पावल्यो आनी 2025त परत वाड जावन कागाळी वट्ट 4402 मेरेन पावल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
