भांगरभूंय | प्रतिनिधी
पणजेकार अगेन्स्ट कॅसिनोचो प्रस्न, पणजी पुलिशेंत कागाळ
पणजीः मांडोवी न्हंयेतल्या कॅसिनो बोटींनी ‘किड्स झोन’ ह्या नांवान ल्हान भुरग्यांक प्रवेश दितात, हो गोवा बाल हक्क कायद्याचें खर उल्लंघन आसा असो आरोप ‘पणजेकार अगेन्स्ट कॅसिनो’ (पीएसी) या संघटनेन केला. हे बेकायदेशीर प्रकारा आड वाल्मीकी नायक, सबीना मार्टिन्स आनी क्रिसेल डायस हांणी शेनवारा पणजी पुलीस स्टेशनांत रातसर कागाळ केल्या.
ह्या वेळार म्हायती दितना क्रिसेल डायस हांणी सांगलें, कायद्या प्रमाण 21 वर्सां सकयल्या कोणाकूय कॅसिनो वाठारांत प्रवेश दिवपाक खर बंदी आसा. अशें आसून लेगीत जायत्या कॅसिनो तारवांनी मुद्दाम ल्हान भुरग्यां खातीर ‘प्ले झोन’ तयार केल्यात. इतलेंच न्हय, थंय भुरग्यांच्यो पार्टी घडोवन हाडटात, आनी सोशल मिडियाचेर ताचे उक्तेपणान जायरात करतात. कॅसिनोंनीच अशा पार्ट्यांचे फोटो आनी व्हिडियो अपलोड केल्यात. तंत्रीक नदरेन पुराय तारवाक ‘कॅसिनो वाठार’ अशें म्हण्टात, देखून थंय भुरग्यां खातीर वेगळो विभाग आसप पुरायपणान बेकायदेशीर आसा.
सामाजिक कार्यकर्त्या सबिना मार्टिन्स हांमी सांगलें, गोवा बाल हक्क कायद्याच्या कलम 8 प्रमाण ल्हान भुरग्यांक खंयच्याय तरेन जुगार खेळपाक प्रवृत्त करप हो गंभीर गुन्यांव आसा. अशें आसून लेगीत कॅसिनो वेवस्थापन भुरग्यांच्या कार्यावळींची ऑनलायन आनी ऑफलायन जायरात दिता. शिक्षणीक संस्थांच्या आवारांतय हे संबंदीं होर्डिंग लायतात. ह्या प्रकरणांत पणजी पुलिसांनी ‘एफआयआर’ नोंद करची अशी मागणी आमी केल्ली. खरें म्हणल्यार गेमींग आयुक्त वेळार हाचेर कारवाय करतले अशी अपेक्षा आशिल्ली, पूण तांणी अजून पावल उखल्लें ना.
सध्या पणजेच्या कॅसिनोंत नेम मोडून जाय ते प्रकार चालू आसात. कॅसिनो भुरग्यांक मजा करपाची सुवात आशिल्ल्या सारकें जायरात करतात. कॅसिनोच्या ह्या बेकायदेशीर प्रकारां आड आमचें झूज चालूच उरतलें अशें वाल्मीकी नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
