भांगरभूंय | प्रतिनिधी
बांदाच्यो फळयो काडिल्ल्यान उदक वाडिल्ल्याचो अदमास
पणजीः वज्रे-भाटपाल, काणकोणां दोगां माणकुल्या भुरग्यांक न्हंयेंत बुडून मरण आयलें. ह्या दोगांतलो एकलो मावशेच्या घरा रावपाक आयिल्लो. हे दुर्दैवी घडणुकेक लागून वाठारांत दुख्ख पातळ्ळां.
मेळिल्ले म्हायती प्रमाण, तीन ल्हान भुरगे घरां सांगनासतना न्हंयेचेर न्हांवपाक आयिल्लें. बांदाच्या फळयो काडिल्ल्यान उदक वाडिल्लें. तांकां उदकाचो अदमास येवंक ना. दोग जाण बुडले. आठ वर्सांचो एकलो वयरुच राविल्लो. ते दोग जाण बुडले हें कळटकूच तांणे धांवत घरां येवन घरच्यांक ही म्हायती दिली.
ध्रुव उदय वाडकार (7, रावपी नवें वाडें) आनी ऋत्विक धनंजय नायक (11, रावपी कारवार) अशी बुडिल्ल्यांचीं नांवां आसात. शाळेक सुटी पडिल्ल्यान ऋत्विक हो आपले मावशेच्या घरा रावपाक आयिल्लो. ताच्या मावशान ताका काल नंदनगदा ताच्या घरा पावयता अशें सांगिल्ले पूण ऋत्विकान आपूण आनीक दोन दीस रावता अशें सांगलें.
भुरगे बुडिल्ल्याची म्हायती मेळ्ळे बरोबर काणकोण उजो पालोवपी दळ घडणूक सुवातेप पावलो. उपरांत दोनूय भुरग्यांक भायर काडले. पूण तो मेरेन तांकां मरण आयिल्लें. दोगांयच्यो कुडी काणकोणच्या सरकारी समाजीक भलायकी केंद्रांत व्हेल्यो. उपरांत दक्षीण गोंय जिल्हो हॉस्पिटलांत पोस्टमार्टमा खातीर धाडल्यो.
मजगतीं, थळाव्यां कडल्यान कळटा ते म्हायती प्रमाण वज्रे बांदाच्यो फळयो काल काडिल्ल्यो. ताका लागून उदकाचो प्रवाह चड आशिल्लो. म्हणून ते बुडले आसूं येतात, असो अदमास थळाव्यांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
