भांगरभूंय | प्रतिनिधी
मडगांवः बाणावलेच्या वासवाडो वाठारांतले एके इमारतीत चलपी ऑनलायन जुगाराच्या अड्ड्यार कोलवा पुलिसांनी शुक्रारा रातीं उसरां धाड घाली. हे कारवायेंत पुलिसांनी तिगांक धरून सुमार 2.60 लाखांचो म्हाल जप्त केलो.
मेळिल्ले म्हायती प्रमाण, बाणावलेतल्या ‘ऐरा सलून अँड स्पा’ वयल्या इमारतीच्या फ्लॅट नंबर दोनांत बेकायदेशीर ऑनलायन जुगार चलता अशी म्हायती पुलिसांक मेळिल्ली. ते प्रमाण 24 एप्रीलाक रातां 10.30 ते 25 एप्रील सकाळीं 1.20 वरां मजगतीं ही कारवाय केली.
सनी तेलंग (30, अहमदाबाद, गुजरात), राहुल पटेल (33, अहमदाबाद, गुजरात) आनी तेजसकुमार दबगर (36, मेहसाणा, गुजरात) ह्या दुबावितांक पुलिसांनी अटक केल्या. सध्या तिनूय दुबावीत बाणावलींतल्या एकाच फ्लॅटांत रावताले.
धाड घालतना कोलवा पुलिसांनी ऑनलायन जुगार खेळपा खातीर वापरिल्ले 2 लॅपटॉप, 5 मोबायल फोन आनी हेर तंत्रीक उपकरणां जप्त केल्यांत. ह्या सगळ्या उपकरणांचें वट्ट मोल 2 लाख 60 हजार रुपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
