भांगरभूंय | प्रतिनिधी
पणजीः हुबळी सावन वास्को वटेन येवपी वालांकिणी–वास्को एक्सप्रेसांतल्यान प्रवास करपी एके जाण्टे बायलेची बॅग चोरून व्हरपी 24 वर्सां पिरायेच्या तरणाट्याक वास्को रेल्वे पुलिसांनी अटक केली. सावर्डे आनी चांदोर रेल्वे स्टेशनां मदीं चलपी रेल्वेंत हा घडणूक घडली. पुलिसांनी रोखडीच ह्या प्रकरणाची चवकशी सुरू करुन कर्नाटकांतल्या दुबाविताक अटक केल्या.
वास्को रेल्वे पुलिसांनी दिल्ले म्हायती प्रमाण, न्यू वाडे-वास्को हांगा रावपी अफरोजा बेगम हुक्केरी (69) हिणें हे संबंदी कागाळ केल्ली. अफरोजा 23 एप्रीलाक सकाळीं हुबळी ते वास्को रेल्वे क्रमांक 17316 (वालांकिणी-वास्को एक्सप्रेस) च्या जनरल डब्यांतल्यान प्रवास करताली. रेल्वे सावर्डे ते चांदोर मदीं आसतना एका
अनवळख्यान तिची हॅंडबॅग काडून घेतली आनी चोरुन व्हेली. बॅगेत 7 हजार रुपयांचो सॅमसंग मोबायल आनी 250 ग्राम वजनाचे 60 हजार रुपयांचें रुप्याचो पैंजण मेळून वट्ट 67 हजारांचो म्हाल आशिल्लो.
अफरोजा हुक्केरी हांचे कागाळी उपरांत पुलिसांनी गुन्यांव नोंद करून चवकशी सुरू केली. तंत्रीक पुराव्याचेर आनी गुप्तचर म्हायतीचेर रेल्वे पुलिसांनी 24 एप्रीलाक सांजेच्या सुमार 6:19 वरांचेर दुबाविताचो सोद लायलो आनी ताका अटक केली. अंबरीश बेग्गर (24, बागलकोट-कर्नाटक) अशें दुबाविताचे नांव आसा. तो मजूरीचे काम करता अशी म्हायती मेळ्ळ्या.
सध्या दुबावीत अंबरीश रेल्वे पुलिसांच्या ताब्यांत आसा आनी ताचे कडल्यान चोरिल्लो म्हाल जप्त केला. मुरगांव पुलीस अधीक्षक गुरुदास कदम हांच्या मार्गदर्शना खाला वास्को रेल्वे पुलीस निरिक्षक अमरनाथ पासी, रेल्वे पुलीस स्टेशनाचे उपनिरिक्षक कृष्ण तळपी हे प्रकरणाची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
