भांगरभूंय | प्रतिनिधी
जार्दिन्यात कोनशार ल्हानसो गाडो, कॅफे करतना सैमीक भोंवतण आसची. यो वच करपी फूड ट्रॅक, फूड कार्ट जार्दिन्यात येतल्यांची तान, भूक न्हिवोवंक शकता.
–
मुख्यमंत्री डाॅ. प्रमोद सावंत हांच्या वाडदिसा निमतान सांखळे गोंयकार एकठांय आयले आसतले. आयज मेरेन सगल्या मुख्यमंत्र्यांनी तांच्या मतदारसंघांचे उदरगती पासत येत्न केल्यात. डाॅ. सावंत हांणीय आपल्या मतदारसंघाक उदरगतीचें वारें दाखयल्यार अजाप न्हय. उदरगत दोनूय पांवड्यार जावची, भौशीक साधन सुविधा, मनीसबळ, समाजाची.
उदरगतीची नवी दिका दाखोवपाचो वावर मुख्यमंत्री करतात. गोंय फाटल्या कांय वर्सांनी देशा बराबरीन कितलें मुखार सरलां ताचो नियाळ 2027 चे वेंचणुकेक वतना जातलो. नवें कितें तरी दिवपाचें येत्न करतना फाटल्याचेर परिणाम जातले, फाटलें ना जातलें हें सत. विज्ञान, तंत्रगिन्यानांत संशोधनाचो व्हड वावर जाला, वेगीं जाता. देश विदेशांतले प्रगतीची गती पळेल्यार गोंय फाटीं पडटा तें कळटा. अशा वेळार उदरगतींत उणें पडल्यार युवा पिळगी माफ करतली? उदरगत करतना नवें तंत्र, यंत्र आसतलें, सैमाची नवी बांदावळ करपाची वाट दिसतली.
सैम, न्हंयो, दर्यादेगो हें गोंयचें दायज. दायजाक घट वेंग मारून तें सांबाळटना गोंयाक दुसरो विमानतळ मेळ्ळो तें डाॅ. सावंत हांच्या सरकाराच्या तेंपार. आयजय नव्या मोपा विमानतळान आमचें लुकसाण केलां असो बोवाळ घालपी दक्षीण गोंयचे आमदार आसात. मोपा विमानतळा वरी दाबोळी विमानतळ करूंक ते शकतले? तिसऱ्या विमानतळाची मागणी करून मळबांत उडपाचीं सपनां पळोवपी आमदार फुडारांत मेळचे. तिसऱ्या संवसारीक झुजाची भास आयकूंक येता तेन्ना झुजाच्या तेंपार मोपा विमानतळ उपेगी पडटलो हें याद दवरात. पर्यटनाची वेगळी वाट उत्तरेंतलो विमानतळ दाखयता. मोपा विमानतळ बांदतना सैमाचें लुकसाण जालां. ते सुवातींत परतून सैमीक भोंवतणची निर्मणी करपाचो हावेस बाळगुया. उदरगतींत सैम, दर्यावेळो सांबाळून पर्यटनाक नवी दिका दिल्यार पर्यटन उद्देग तिगतलो.
एक ल्हानशी याद राजकारणाच्या वेगळ्या पांवड्यार 2027 चे वेंचणुकेचे दिकेन वतना करून दितां. राजपाटण पणजी स्मार्ट सिटी जातना येणावळीचे नवे मार्ग पणजी म्हापालिकेक दिसल्यात. शारांतलें मळ्यांतलें तळें स्मार्ट सिटीचे मुळावे येवजणेंत कशें जातलें तें मांडिल्लें. आमच्या विद्यार्थी जिणेतलें मळ्यांतलें तळें नितळ उदकाचो झरो. उडपी सवणी, पक्षी, तांची गीतां आयकुपाचें थळ. त्या तळ्याची सैमीक उदरगत करपाची येवजण स्मार्ट सिटी प्लॅनांत आशिल्ली. कितें जालें ते येवजणेचें? स्मार्ट सिटी कंपनीची बसका मुख्यमंत्र्यांनी घेतल्यार मळ्यांतल्या तळ्याक संजिवनी मेळटली सांतिनेझच्या वडा वरी. स्मार्ट सिटी जातना शारांतल्या सांतिनेझ वाठारांतलें दायज वडाचें झाड मारिल्लें. बोवाळ जाल्ल्यान तें खांदयो कापिल्लें झाड मुळा सयत कांपाल परेड ग्रावंडार हाडून लायिल्लें. परेड ग्रांवडार दायज वडाचें झाड मूळ धरपाक लागलां. उदरगतीचे वाटेन वतना जाल्ल्या सैमाच्या लुकसाणांत सैमाची परतून बांदावळ जावंक शकता ही देख दिवपी तें वडाचें झाड.
स्मार्ट सिटींतलें उत्तर गोंय जिल्होधिकारी कचेरे लागसरचे जार्दीन नवें रुप घेता. परेड ग्रावंडार, आझाद मैदानार वाॅकिंग ट्रॅक आसात. दिसाचीं दोन तीन वरां ते शारांतल्या लोकां पासत मेळचे. स्मार्ट सिटींतल्या कामाचेर देखरेख दवरपी यंत्रणा जाय. मुख्यमंत्र्यांचें बसकेंतल्यान स्मार्ट सिटीक नवी दिका मेळटली. कांपाल वाॅक वे, परशुराम पुतळो थळ सेल्फी पाॅयंट जातात. तांची नितळसाण राखप, ते हेडग्या, पाेशिल्ल्या सुण्यांचे पाॅयंट न जावप हेखातीर निर्णय घेवचे पडटले. सैमाची नवी बांदावळ करपाचे येत्न कांपाल वाॅक वे र जातात. कांपाल फेस्तां ग्रावंडार (साॅरी बांदोडकार ग्रावंड) चारूय देगेनी झाडां लावचीं (बाॅन्साय नाका). ग्रावंडाचें लेव्हलिंग करपाचो वावर डिसेंबर मेरेन पुराय करचो. बांदोडकार ग्रांवड पार्किंगे खातीर बंद जाला, लागसरचो वाठार पार्किंगा पासत सदांच उपेगाक हाडचो.
तुटिल्ली, मोडिल्ली, भेरेल्ली, आवाजा यंत्रणा शेणिल्ली कला अकादमी आयजय वेवस्थीत आसा. कार्यावळीय कला अकादमीत जातात, गिन्यान, मनरिजवणेच्या नव्या रुपांनी. कला अकादमी आयज सैमांतय भिजता. आंबे, पणस, गुलमोहर, केळी, आपट्याचीं, चाफ्याचीं, दसणीचीं झाडां गोंयच्या मुखेल गोंयच्या मुखेल कलाघराक – कला अकादमीक थाकाय दितात.
कला अकादमी लागसारचो बांदोडकार ग्रावंड तीन चार वर्सांनी झाडांनी सैमा सांगातांत भिजतलो, थंडसाण दितलो ही मोख स्मार्ट सिटी खाला दवरपाची गरज आसा. भगवान महावीर पार्कांत सोबीत तकटे लायल्यात. झाडां लायात, सैम तिगयात, सैमांतल्यान सर्गाची निर्मणी करात हो तातूंतलो एक. कांपाला वयलें हें पार्क सुदारतना पार्कांत चाफो, मोगऱ्याक सुवात मेळची, काँक्रिटाचें रान, नकलीपण नाका. सैमीक हरयाळीचें कार्पेटिंग त्या जार्दिन्यांत करप शक्य आसा. गोंयच्या हेर वाठारांतल्या जार्दिन्यांत कोनशार ल्हानसो गाडो, कॅफे करतना सैमीक भोंवतण आसची. यो वच करपी फूड ट्रॅक, फूड कार्ट जार्दिन्यात येतल्यांची तान, भूक न्हिवोवंक शकता.
शारांतल्या मुखेल मार्केटांतली फक्त चाळीस वर्सां आदींची बिल्डिंग प्लॅनींग सारकें नाशिल्ल्यान मोडची पडल्या. लागीं लागीं पाचशें वर्सांचो पाटो पूल उपेगाचो तरीय स्ट्रक्चरल आॅडीट जावपाक जाय.
स्मार्ट सिटी खाला नवें स्मार्ट मार्केट बिल्डिंगेचे सुवातींत तळाक केंद्रीय येवजणेचो लाव घेवन कोल्ड स्टोरेज, कोल्ड चेन सुविधा उबारच्यो. नवें सहकार माॅल केंद्रीय येवजणेंतल्यान थंय जावचें. दोन मजल्यां परस उंचेली बिल्डिंग मार्केटांत नाका. मोडिल्ले बिल्डिंगेचे सुवातींत पार्किंग काॅम्पलेक्स बांदल्यार कांय रस्ते मेकळे जातले, येरादारीची कोंयडी उणी जातली.
स्मार्ट सिटींतल्या पाटो प्लाझार केंद्र सरकाराचीं कार्यालयां बिल्डिंगेनी आसात. गोवा कोंकणी अकादेमीचें कार्यालय केंद्र सरकाराचे बिल्डिंगेंत आसा. कोंकणी अकादेमीची पयलींची पाटो वाठारांतली सुवात स्मार्ट सिटी नवे दिकेन वतना राजभास संचालनालय बिल्डिंगेचो विचार जावचो. राजभास संचालनालय बिल्डिंगेंत राजभास अकादमीचें नवें दार मेळूंक शकता. ग्रीन बिल्डिंग संस्कृतायेंतले राजभास संचालनालय बिल्डिंगेंत, राजभास अकादमी जावची. गोवा कोंकणी अकादेमी, मराठी अकादमी, साहित्य सेवक मंडळ प्रतिनिधींचो आस्पाव राजभास अकादमीचेर आसचो.
बिल्डिंगो मोडटना कार्यालयां, दुकानां मोडटात. तातूंतलें सामान, साधनसुविधा विखुरतात, विकतात नव्याचे बांदावळी पासत.
स्मार्ट बांदावळ करतना पयलींच्यो सुविधा, कदेलां, मेजांय आवटडेटेड जातात तांचो परतून उपेग करपाची गरज आसा. स्पेस ल्हान तेन्ना कदेलां, मेजां भाड्यान हाडूंक येतात. 2027 चे वेंचणुकेंत नवीं मुखामळां नवी दिकाय दाखयतलीं अशी आस्त बाळगुया.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
