भांगरभूंय | प्रतिनिधी
सध्या आप सर्व्हायव्हल मोडांत तर भाजपा एक्स्पान्शन मोडांत आसा.
—————————–
‘धुरंधर’ राघव चड्ढान आपाच्या व्हड्यांतल्यान स्वता उडी मारलीच, पूण वांगडा हेर सात जाणांकूय व्हेले. तीग जाण भाजपाचे बोटींत चडल्यात, उरिल्ले परत व्हड्यांत परततात काय… . फाल्यां मेरेन कळटलें. आपाक हो धपको. गोंयांत अमित पालेकार आनी हेरांनी हालींच पक्ष सोडिल्लो. आप, काँग्रेस आनी हेर कांय विरोधी पक्षांचे विचार एकमेकांक जुळपी. म्हणटकच हेरा भशेन राघवूय काँग्रेसींत वतले अशें दिसतालें. मात तांणी उदेंत्या सुर्याक नमस्कार केलो. तांकां पक्ष सोडपाक लायला, तपासयंत्रणांच्या भंयान ते सत्ताधारी पक्षांत गेल्यात, अशें तर्कवितर्क सोशल मिडियाचेर येवंक लागल्यात. राघव हांचे वांगडा गेल्ले अशोक मित्तल हे लवली प्रोफेशनल विद्यापिठाचे कुलगुरू. तांच्या जालंधरांतल्या घराचेर ईडीन 15 एप्रीलाक छापो घाल्लो. म्हणून घडये कोणाक तशें दिसता जावये.
राघव पंजाबांतले राज्यसभा खासदार. विमानतळाचेर मेळपी जिनस, गॅस आनी भौसाच्या विशयांचेर अभ्यास करून उलोवपी हो तरणाटो फुडारी. संजय सिंहा सारको. राघव तशे फाटलीं दोन वर्सां मनान पक्षा वांगडा नाशिल्लेच. ‘हांव योग्य व्यक्ती आसूनच चुकीच्या पक्षांत आसा, अशें म्हाका दिसतालें. प्रधानमंत्री मोदी हांणी फाटल्या कांय वर्सांनी खूबच बरें काम केलां’, अशें तांणी काल सांगलें. 21 मार्च 2024 दिसा केजरीवाल हांकां सोरो भानगडींत अटक जाल्ली तेन्ना राघव हांणी उतरुय काडूंक नाशिल्लें. फेब्रुवारी 2025 त दिल्ली वेंचणुकेंत आपाक फक्त 22 जागे मेळ्ळे. सत्ता सोडची पडली, तेन्नाय राघव शांत रावले. पोरूं जानेवारींत तांणी आपल्या सोशल मिडिया हॅण्डला वयलो आपाचो बॅनर, सान्न काडिल्ली. अंदूं सोरो भानगडींतल्यान आपाच्या सगल्या दुबावितांची निर्दोश सुटका जाली, तेन्ना राघव खंयच दिसले नात. इराण झुजाचेरूय ते आपा वतीन उलोवंक नात. पक्षाच्या व्हिपाक लागून सगल्यांनी सभात्याग केलो, पूण राघव सभाघरांत बसून रावले. हालींच राघव हांका उप फुडारीपदा वयल्यान काडून ती जापसालदारकी अशोक मित्तल हांकां दिल्ली. पूण तांचेर रोखडोच इडीचो छापो पडलो. ही भाजपाची पंजाब वेंचणुकेची तयारी अशी टिका मुख्यमंत्री भगवंत मान हांणी केल्ली. आमी झाडां वयल्यान पडपी पानां न्हय, अशें तांणी म्हणिल्लें. मात आतां आपाचें राज्यसभेंतलें झाडूच पडलां, (आपाचें चिन्न आशिल्ले सान्नीक हिंदींत झाडू म्हणटात.) अशें म्हणचें पडटलें.
ह्या पक्षांतरांत व्हडले चॅरे गेल्ल्यान आपाची विस्वासार्हता उणी जावं येता. संसदेंतली शक्त देंवतली, पंजाबांत धोको, राष्ट्रीय प्रतिमाय दुबळी जांव येता. थीर फुडारपण ही भाजपाची इमेज घट जातली. आप आनी हेर पक्षांतले पेझाद फुडारी आतां भाजपांत आसात. पंजाबांत आतां भाजपाक संद मेळूं येता. पूण आपाचो लोकांचेर आशिल्लो प्रभाव (खास करून दिल्लींत) उणो जावंक ना. सध्या आप सर्व्हायव्हल मोडांत तर भाजपा एक्स्पान्शन मोडांत आसा. आपा पसून कुशीक जाल्ले वा केल्ले फुडारी पळयल्यार ‘गेलो उडत’ हें तांचें धोरण कशें दिसता. तांणी धडाधड फुडाऱ्यांक कुशीक काडल्यात. पक्ष मूळ विचारां पसून पयस गेला, जनकल्याण, भ्रश्टाचारविरोधी अजेंडा कमी जाला, निर्णय प्रक्रियेंत सगल्यांक स्थान ना, पक्षांत अंतर्गत लोकशाय ना अशी कांय कारणां राघवान आनी हाचे पयलीं हेरांनीय दिल्यांत.
26 नोव्हेंबर 2012 त भ्रश्टाचारी विरोधी आंदोलनांतल्यान वयर सरिल्लो हो पक्ष. योगेंद्र यादव, प्रशांत भूषण, शाजिया इल्मी, अलका लांबा, कुमार विश्वास, पक्षा वांगडा आशिल्ली किरण बेदी अशे जायते फुडारी आपा वांगडा नात. बरेच थळावे लोकप्रतिनिधी, समितीचे जाळवणदारूय गेल्यात. मतभेद आनी फूट ही तांची सदचीच समस्या. हें एक्झीट पॅटर्न चालूच उरतलें कांय बंद जातलें, तें आतां पळोवपाचें. फुडलीं 1-2 वर्सां आपा खातीर अग्नीपरिक्षे सारकींच आसतली!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
