भांगरभूंय | प्रतिनिधी
पणजी: फोंडें पोटवेंचणूक रद्द करपाच्या मुंबय उच्च न्यायालयाच्या आदेशाक आव्हान दिवपी याचिकेचेर सर्वोच्च न्यायालयांत सोमारा 27 एप्रीलाक सुनावणी जातली. फोंडें पोटवेंचणुकेंतले काँग्रेस उमेदवार डॉ. केतन भाटीकार हांणी ही आव्हान याचिका दाखल केल्या.
सर्वोच्च न्यायालयांत सुनावणे खातीरचे वळेरेंत सोमारा हे याचिकेचाे आस्पाव जाला. आदले मुख्यमंत्री रवी नायक हांच्या मरणाक लागून विधानसभेंत फोंडें मतदारसंघाच्या आमदाराची सुवात रिती जाली. कायद्या प्रमाण विधानसभेंत एखाद्या वांगड्याची सुवात रिती जातकूच 6 म्हयन्यां भितर वेंचणूक जावप गरजेची आसता. फोंडें पोटवेंचणूक 9 एप्रीलाक जावपाची आशिल्ली. प्रचाराची मुजत सोंपून मतदानाच्या आदले दिसा पोटवेंचणूक रद्द करपी आदेश मुंबय उच्च न्यायालयान पोटवेंचणुकेक आव्हान दिवपी याचिकेचेर दिलो. हाका लागून वेंचणूक आयोगान पोटवेंचणूक रद्द करपी अधिसुचोवणी जारी केली. वेंचणूक आयोगाची तयारी तशेंच उमेदवारांनी वेंचणुके खातीर केल्लो खर्च फुकट गेलो. विधानसभेचो कार्यकाळ सोंपपाक वर्सा परस उणो कालावधी आसत जाल्यार पोटवेंचणूक घेवपाची गरज ना, असो कायदो आसा. विधानसभेचो कार्यकाळ 9 एप्रील 2027 पयलीं सोंपतलो. हाका लागून उच्च न्यायालयान पोटवेंचणूक रद्द करपी आदेश दिलो.
सर्वोच्च न्यायालयांत दाखल केल्ले याचिकेंत वेंचणूक आयोगाक प्रतिवादी केला. विधानसभेचो कार्यकाळ सोंपपाक वर्सा परस उणो कालावधी आसत जाल्यार वेंचणूक घेवची न्हय, हो नेम बंधनकारक ना, असो दावो आमदार अॅड. कार्लुस फेरेरा हांणी केला. हे संबंदी पंजाब, हरियाणा, गुवाहाटी उच्च न्यायालयान वेगळे वेगळे आदेश दिल्यात. मुंबय उच्च न्यायालयाच्या नागपूर खंडपिठान जसो आदेश दिला ते प्रमाण गोंयांतल्या उच्च न्यायालयान आदेश दिला. ह्या आदेशाचो फेरविचार जावपाची गरज आसा, अशें अॅड. कार्लुस फेरेरा हांणी सांगलें. फोंडें मतदारसंघ देड वर्स आमदारा बगर रावतलो. सर्वोच्च न्यायालय उच्च न्यायालयाच्या आदेशाचो फेरविचार करतलें, अशें अॅड. कार्लुस फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
