भांगरभूंय | प्रतिनिधी
पेडणें: पोरस्कडे हांगा राष्ट्रीय म्हामार्ग 66 चेर शुक्रारा दनपारां 1.45 वरांच्या सुमाराक मोटारी वेलें नियंत्रण गेल्ल्यान जाल्ल्या अपघातांत पुणेंचे शैलेश सातो (28) आनी श्रावणी सातो (22) हें जोडपें गंभीर रितीन जखमी जालें. जाल्यार ह्या अपघातांत विजेचो खांब मोडून सकयल पडलो. मोटार रस्त्याचे कुशीक आशिल्ले झिलींनी गेली. मोटारीचें व्हड प्रमाणांत लुकसाण जालां.
पेडणें पुलिसांनी दिल्ले म्हायती प्रमाण एम एच 12 आर वाय 7675 ह्या क्रमांकाचे मोटारीन शैलेश सातो आनी श्रावणी सातो हें जोडपें पुणें सावन गोंयांत येतालें. उड्डाणपुलाचें सुरू आशिल्ल्या बांदकामा पसून कांय अंतराचेर तांची मोटार पावतकच चालकाचें मोटारी वेलें नियंत्रण गेल्ल्यान पयलीं ह्या मोटारीन म्हामार्गा पसून भायर आशिल्ल्या विजेच्या खांब्याक नेटाचो धपको दिलो. तातूंत विजेचो खांब मोडून पडलो. तेच स्थितींत मोटार गतीन रस्त्याचे भायर सकयल्या वाठारांत आशिल्ले झिलींनी घुसली.
ह्या अपघातांत शैलेश सातो आनी श्रावणी सातो हें जोडपें गंभीर रितीन जखमी जालें. 108 एम्बुलन्सींतल्यान तांकां उपचारा खातीर व्हेलें. म्हापशेंच्या एका खाजगी हॉस्पिटलांत तांणी उपचार घेवपाचें पसंत केलें. ह्या खाजगी हॉस्पिटलांत ह्या जोडप्याचेर उपचार सुरू आसात.
पेडणें पुलीस स्टेशनाचे सहाय्यक उपनिरिक्षक अभय पालयेंकार हांणी अपघाताचो पंचनामो केलो आनी तेच फुडलो तपास करतात.
फाटल्याच सप्तकांत एका ट्रक ड्रायव्हराचो ताबो वचून हेच सुवातेर विजेचो खांब मोडिल्लो, आनी हांगा घाल्लो हो नवो खांब काल मोटारीन धपको दिल्ल्यान परतून मोडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
