भांगरभूंय | प्रतिनिधी
फिल्म समीक्षा
लेखाची सुरूवात करतना, पयल्यांत पयलीं हांव दिग्दर्शक वर्धन विजयकुमार कामत आनी निर्माते गुरूनाथ पाताडे हांकां परबी दिवंक सोदता. कारण, फुल टायमपास मसाला फिल्मां लोकांचें मनोरंजन करपाक, बॉक्स ऑफिसाचेर धुमाकूळ घालपाक एका फाटोफाट एक वळेरेंत राविल्ली आसतना, तांणी समांतर चित्रपट,आर्ट फिल्माक चड जुळपी संवेदनशील विशय हो विनोदी प्रसंग, सस्पेन्स, हलकी फुलकी कॉमेडी आनी संवेदनशील दृश्यांच्या माध्यमांतल्यान प्रेक्षकांचे सामकार दवरपाचें धाडस केलें. तातूंत ते जैतिवंत जाल्यात.
मध्यम पिरायेचे दोन वेवसायिक रंगमाचेयेवेले कलावंत आनी इश्ट आंतोन (जॉन डिसिल्वा) आनी रोहन नायक (सुशांत लक्ष्मीकांत नायक) हे गोंयांत रंगमाचयेर नाटक करून घर चलयतात आनी अभिनय करपाची आपली उमेद भागयतात. सगलें बरें चल्लां, पूण आंतोन मात्सो अस्वस्थ आसा. ताका आतां फिल्म निर्माण प्रक्रियेंत येवन फिल्ममेकिंग मळाचेर हात आजमावपाची इत्सा आसा. सुरवातेक कासकिसावां, वाद, झगडीं करून ताचो कलाकार इश्ट रोहन ताका निमाणें साथ दिवपाची थारायता आनी कॅमेरा हाडप, नाटकाच्या पंगडातल्यान भायर सरतना दिग्दर्शक आनी कलाकारांचें वायटपण तशेच नाराजी ओडून घेवप हें जाले उपरांत फिल्म खंयच्या विशयाचेर करचें हो विचार करतना, तांचे सामकार येता तो उमेश हो तरणाटो. ताचे विचित्र वागणुकेक लागून तशेंच जायते फावटी तांचे फुडल्यान वावुरल्या कारणान उमेश तांचे नदरेन भरलेलो आसता.
उमेश वेलिंगकार (अमर च्यारी) हो तरणाटो गांवगिऱ्या वाठारांत रावपी, मेळटा तीं कामां करपी आनी क्रिकेट खेळांत जायती रूची दाखोवपी एक तरणाटो, जाचे सरभोवतणी एक उत्सुकतायेचें आनी रहस्यमयतेचें वलय आसा. रोहन आनी आंतोन हांकां उमेशा विशीं उमळशीक आसता आनी ताचे जिणेविशीं, भूतकाळाविशीं अजून जाणून घेवपाची तांकां इत्सा आसता, पूण उमेश ना केन्ना कोणा कडेन उलयना, ना आपले पयलीच्या आयुष्याविशीं केन्ना सांगिना. उमेशाची चवकशी करतना ताचेविशीं एक व्हड गजाल आंतोन आनी रोहन हांच्या लक्षांत येता आनी चड म्हायती घेवपाक ते जेन्ना हळूच उमेशाच्या पडीक घरात पावतात तेन्ना तांकां जें दिसता तें पळोवन ते अजाप जातात. उमेशाचें पयलीचें जीवन कितें आसता? घरान चवकशी करपाक आयिल्ले आंतोन आनी रोहन हांका कितें मेळटा? उमेशाचे फुडें कितें जाता? आंतोन आनी रोहन उमेशाचेर फिल्म करपाक येसस्वी जातात काय? हांव हांगा ‘स्पॉयलर’ कसोच दिवचो ना. ह्या प्रस्नाचो जापो तुमीच सिनेमाघरांत वचून ‘उमेश’ पळोवन मेळोवपाच्यो. सारकें मूं ?
अभिनय
सुशांत लक्ष्मीकांत नायक, माधुरी शेटकार, सी डी सिल्वा आनी जॉन डिसिल्वा हांणी आपल्या वांट्याक आयिल्ल्यो भूमिका बेसबऱ्यो आनी प्रामाणिकपणान केल्यात. खास करून सुशांत नायक, माधुरी शेटकार आनी जॉन हांणी भूमिकेची नस वेवस्थित धरिल्ली आसा. सी डी सिल्वा हांचो कांतारांचेर मोग करपी जाणटे पिरायेच्या बापायचो वावर सहज दिसता. जॉन डिसिल्वा हांणी संवेदनशील भूमिका करतना ‘कॉमेडी किंग’ हे प्रतिमेक जागून कांय सुवातेर बेसबरी ‘कॉमिक टायमिंग’ दाखोवन वाचिक आनी आंगीक अभिनया वरवीं कांय प्रसंग फुलयल्यात, जे प्रेक्षकांमदीं हांसयाळे फुलयतात.
ह्या सिनेमाचें एक ‘सरप्रायझ गिफ्ट’ म्हणल्यार अमर च्यारी. आपले कॉमेडी रिल्साच्या आदारान यू ट्यूब आनी सोशल मीडिया वरवीं विनोदाचें टायमिंग आनी आंगीक अभिनय करून ‘कॉमेडी रिलस्टार’ म्हूण प्रतिमा निर्माण केल्ल्या ह्या कलाकारान अशी गंभीर भूमिका करप हें एक खूब व्हड आव्हान आसता आनी तें तितलें सोंपेंय आसना. अमर हांणी हें आव्हान पेलपाचो प्रामाणिक यत्न केला आनी तातुंत जैतिवंत थारल्यात. ल्हान- ल्हान भुमिकांनी आशिल्ल्या कलाकारांनी आपलीं कामां बेसबरी केल्यात. विजयकुमार कामत (आमदार), बंटी उडेलकार (बेबदो), सतीश गांवकार (हॉटेल विठोबातलो वेटर आनी नाट्यकलाकर ), समीर शेट्ये (हौशी कलाकार ), रती भाटीकार हांणी आपल्या वांट्याक आयिल्ल्यो भूमिका बेसबऱ्यो वठयल्यात.
दोन बुजुर्ग कलावंत
गोंयचे दोन बुजुर्ग कलावंत ज्ञानेश मोघे आनी अजित केरकार हांचें एक सुखावह अशे दर्शन ह्या फिल्मांत आमकां घडटा. आयज खंयच्याय मुखेल प्रवाहाच्या हिंदी वा दक्षिणात्य सिनेमांत नायक वा हिरो प्रभास, रजनीकांत, पवन कल्याण वा आनीक कोणय आसूं, सिनेमांत ज्येश्ठ अभिनेते सुपरस्टार अमिताभ बच्चन आसले काय तांची सोयरो कलाकार वा ‘केमियो’ (Cameo) म्हूण आशिल्ली भूमिका ल्हान आसुनय प्रेक्षक उखलून धरतात. मोघे आनी केरकार हांचे विशीं प्रेक्षकांचें अशेंच जातलें. ज्ञानेश मोघे फिल्म मेकर आनी दिग्दर्शक आनी अजित केरकार नाट्य दिग्दर्शक म्हुण ल्हान, पूण प्रभावी भूमिकेत आसल्या कारणान प्रेक्षकांक एक सुखद धक्को दितले. ल्हान भूमिका वांट्याक येवनय बी तांचे ‘प्रेझेन्स’ वा आसप प्रेक्षकांक फिल्म पळेयतना सुखावता.
फिल्मांत कथानका प्रमाण कलाकारांची केल्ली निवड प्रभावी आसा. दिग्दर्शक आनी कास्टिंग डायरेक्टर हांची ते विशीं तोखणाय जावची. फिल्म पळयतना कलाकारांचो अभिनय, धालो, घुमट आरती, मटक्याचो नंबर लावपी पात्रां ह्या अशा संदर्भाक लागून गोंयचे मातयेंतलो सिनेमा पळयतां, अशें दिसता.
तांत्रिक बाजू
तांत्रिक बाजू एकदम बऱ्यो आसात. वास्तविक डीओपी आनी फिल्माचे संपादन करपी गौरव गोखले हांची तोखणाय करपा सारकी. ताका लागून फिल्म मात्शे ‘पॉलिश्ड’ दिसता. श्रीकांत कबोथू हांकाय बरेच श्रेय दिवपाक जाय तांत्रिक बाजू उठून दिसपाक.
दिग्दर्शक आनी निर्माते हांचेर एक शब्द उलोवंक जाय. वर्धन कामत हे तशे कलावंत, नट म्हूण फामाद आसात. पूण दिग्दर्शक म्हणूनय तांणी ‘उमेश’ फिल्माच्या निमतान येसस्वी पावल मारलां. निर्माते म्हुण गुरूनाथ पाताडे हांचेंय अभिनंदन करपा सारकें. कोकणी सिनेमाक अर्थीक अडचणी, निर्माते मेळप ना, गुंतवणूक ना, वितरण जायना अश्यो समस्या आसतना तांणी धाडस करून ह्या वेगळ्या विशया वयल्या सिनेमाक हात घालून तो लोकां मदीं पावोवपाचें शिवधनुष्य पेलपाचें धाडस दाखयलां. ताका लागून तांकांय परबीं.
आतां एक निरीक्षण गोंयच्या प्रेक्षकांक लागून – कोकणी सिनेमा म्हणलो काय येवपी ‘अँह, कोंकणी पिक्चर रे! बेजार येवपाचो,’ हो निरशेवणेचो नकारात्मक दृष्टिकोन सोडात आनी ‘उमेश’ हो सिनेमा, सिनेमाघरांत वचून पळयात. कोंकणी सिनेमा कडेन पळोवपाची तुमची नदर निश्चित बदलतली.
– सनतकुमार फडते
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
