भांगरभूंय | प्रतिनिधी
पणजी : मुख्यमंत्री डॉ. प्रमोद सावंत हांणी आपल्या वाडदिसा निमतान स्वता जावन पणजी- बेती न्हंय मार्गार फेरीबोटीच्या प्रवाशांक भेट दिल्या. मुख्यमंत्र्या हस्तुकीं ह्या मार्गार दोन नव्या आधुनीक फेरीबोटींचें शुक्रारा उक्तावण जालें. ह्या आधुनीक फेरीबोटींक लागून प्रवाशांचो प्रवास जलद आनी सोयीचो जातलो.
मुख्यमंत्र्याच्या वाडदिसा निमतान पणजे फेरी धक्याचेर कुशावती आनी साळावली ह्यो दोन आधुनीक फेरीबोटी प्रवाशांचे सेवेंत दाखल जाल्यो. उक्तावणा वेळार न्हंय येरादारी मंत्री सुभाष फळदेसाय, साळगांवचे आमदार केदार नायक, उत्तर गोंय जिल्हो पंचायत अध्यक्ष रेश्मा बांदोडकार, न्हंय येरादारी खात्याचे संचालक विक्रमसिंह राजेभोसले आनी हेर मानेस्त हजर आसले. दोन फेरीबोटींच्या उक्तावणा उपरांत बेती वटेन नवे फेरी धके आनी शेडीचें उक्तावण जालें. तशेंच ह्या वेळार नवे कुशावती फेरीबोटींत मुख्यमंत्री डॉ. प्रमोद सावंत हांणी केक कांपून आपलो वाडदीस मनयलो.
म्हज्या वाडदिसा निमतान लोकांक बरी येरादारी सुविधा दिवपा खातीर न्हंय येरादारी खात्यान नव्या फेरीबोटींचें उक्तावण केलां. हे नवे फेरी सुविधेक गोंयकारांचो भरपूर प्रतिसाद मेळटलो. लोकांक न्हंय मार्गाचेर प्रवास करपा खातीर सोयीचें करपा खातीर आमी ह्यो अतिरिक्त फेरीबोटी तैनात केल्यात. हावं न्हंय येरादारी खात्याचे मंत्री सुभाष फळदेसाय आनी अधिकाऱ्याक शुभेत्सा दिता, अशें मुख्यमंत्र्यान उक्तावणा उपरांत म्हणलें.
ह्यो आधुनीक फेरीबोटी आलतड आनी पलतड तीन मिनटां भितर मारतात, अशें मंत्री फळदेसाय हांणी सांगलें.
परंपरीक फेरीबोटींची 5 ते 6 मोटारींची तांक आसली आनी आतां नव्या फेरीबोटींची तांक 9 मोटारींची आसा. आंतरराष्ट्रीय दर्जाचें तंत्रज्ञान आशिल्लो फेरीबोटी आमी गोंयांत हाडल्यात. रो- रो फेरीबोटी गोंय सोडल्यार देशांत खंयच नात. डिसेंबर मेरेन दिवाडे मार्गार आमी दोन धाकट्यो रो-रो घालतले आनी ऑगस्ट मेरेन तीन नव्यो फेरीबोटी येतल्यो, अशी म्हायती फळदेसाय हांणी दिली.
हरीत उर्जा आनी नवी संकल्पना चालीक लावन पर्यावरणाचो ऱ्हास उणो करपाच्या उद्देशान आमी परंपरीक फेरीबोटींच्या जाग्यार नव्यो फेरीबोटी वाडयल्यात. रो- रो फेरीबोटी घातले उपरांत बरी सेवा मेळ्ळ्या आनी प्रवासी वाडल्यात. उड्डाणपुलाच्या कामाक लागून येरादारीचे कोंयडेंत आडकून उरचे परस इंधन आनी वेळ वाटोवपा खातीर मोटारी रो-रो फेरीचो वापर करतात. काळा प्रमाण फेरीबोट सेवा सुदरावपा खातीर आमी अपग्रेड करतले, अशें फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
