भांगरभूंय | प्रतिनिधी
ट्रान्झीट रिमांडाचेर आयज हाडटले गोंयांत
हिमाचल प्रदेश पुलिशेचे मजतीन घेतलो ताब्यांत
सेंट फ्रान्सीस झेवियर हांचे विशीं केल्लें आक्षेपार्ह विधान
भांगरभूंय । प्रतिनिधी
पणजी : वास्कोचे भौशीक कार्यावळींत सेंट फ्रान्सीस झेवियर हांचे विशीं आक्षेपार्ह विधान करपी गौतम खट्टर हाका गोंय पुलिशेच्या गुन्यांव फांट्याच्या पंगडान ताब्यांत घेतला. ताचे मोटारीचे म्हायती वयल्यान गुन्यांव फांट्याच्या पंगडान हिमाचल प्रदेश पुलिशेचे मजतीन शुक्रारा 24 एप्रीलाक सांजे वेळार ताका धरलो. शेनवारा 25 एप्रीलाक अटक करून ताका ट्रान्झीट रिमांडाचेर गोंयांत हाडटले.
गौतम खट्टर हाणें वास्को परशुराम जयंती निमतान आयोजीत कार्यावळींत सेंट झेवियर हांचे विशीं आक्षेपार्ह विधान केल्लें. ह्या प्रकरणांत वास्को पुलीस उपनिरिक्षक डेव्हीड कॉस्ता हांणी खट्टर हाचे आड गुन्यांव दाखल करून तपास सुरू केला. गौतम गोंयांतल्यान मूळ गांवांत गेल्ल्याचें मुखार आयलें. ते उपरांत वास्को पुलिशेचो पंगड गौतम खट्टर हाचो सोद घेवचे खातीर उत्तराखंडाक धाडलो.
मजगतीं, प्रकरणाचें गांभीर्य लक्षांत घेवन प्रकरणाचो तपास गुन्यांव फांट्या कडेन वर्ग केलो. गुन्यांव फांट्याचे पुलीस निरिक्षक परेश नायक हांणी तपास सुरू करून आयोजकांची जबानी नोंद केली. तातूंत आयोजकांनी गौतमाचो भाव माधवा वरवीं ताची उपस्थिती करून घेतिल्ल्याचें मुखार आयलें. माधव हाणें लॉजिस्टीक वेवस्थे खातीर विमानाची तिकेट, रावपाची वेवस्था आनी 51 हजार रुपया घेतिल्ले. तशेंच, माधव हाणें भाशण बरोवन दिल्लें आनी गौतमान तें वाचून दाखयलें. ताका लागून माधव हाका सहदुबावीत केला. हे मजगतीं, वास्को पुलिशेच्या पंगडान माधवाक अटक करून गोंयांत हाडलो आनी गुन्यांव फांट्या कडेन दिलो.
मजगतीं, गौतम खट्टर हाचो सोद लागूंक नाशिल्ल्यान, तशेंच तो विदेशांत पळून वचपाची शक्यताय आशिल्ल्यान ताचे आड लूक आवट नोटीस जारी केली. तशेंच ताचे आड अजामीनपात्र वॉरंट जारी केलें. अधिक्षक राहुल गुप्ता हांच्या मार्गदर्शना खाला निरिक्षक विकास दयेकार हांच्या फुडारपणा खाला सहाय्यक उपनिरिक्षक श्रीराम साळगांवकार हांचो पंगड उत्तराखंडाक धाडलो. ह्या पंगडान ताचो सोद सुरू केलो. मजगतीं, गौतमान ताचो मोबायल फोन बंद केलो. पंगडान ताच्या मूळ घरा सोद घेतलो, तेन्नाय तो मेळूंक ना. अदीक चवकशी केली तेन्ना तो एका सांगात्या वांगडा मोटारीन प्रवास करता, अशी म्हायती मेळ्ळी. तशेंच तो हिमाचल प्रदेशांतल्या शिमला वाठारांत आशिल्ल्याचें मुखार आयलें. ते प्रमाण, गुन्यांव फांट्यान हिमाचल प्रदेशाच्या पुलिसां कडेन संपर्क केलो आनी ताची मजत घेवन शुक्रारा 24 एप्रीलाक सांजे वेळार कुलू- मनाली वाठारांत गौतम खट्टराक ताब्यांत घेतलो. मजगतीं, गुन्यांव फांट्याच्या पंगडान गौतम खट्टर हाका ताब्यांत घेतला. ट्रान्झीट रिमांड आनी अटकेची प्रक्रिया केले उपरांत शेनवारा गुन्यांव फांट्याचो पंगड ताका गोंयांत घेवन येतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
