भांगरभूंय | प्रतिनिधी
डॉ. प्रमोद सावंत हांचो वाडदीस दबाज्यान, ‘हेल्थ वीथ आयुर्वेद’ उपक्रमाचो शुभारंभ
भांगरभूंय । प्रतिनिधी
दिवचल : आयुर्वेद ही भारताची प्राचीन आनी प्रभावी वैजकी परंपरा आसा. ती आधुनीक जीवनशैलींत लेगीत खुबूच फायद्याची आसा. आयुर्वेदांतल्यान भलायकी सेवेची नवी दिशा दिवपाचो सरकाराचो यत्न आसा, अशें मुख्यमंत्री डॉ. प्रमोद सावंत हांणी सांगलें.
‘हेल्थ वीथ आयुर्वेद चेक्ड बाय डॉक्टर 2.0’ हे विशेश भलायकी उपक्रम उमेदीन मनयलो. आयुर्वेदाच्या माध्यमांतल्यान गोंयांतली भलायकी सेवा अदीक सक्षम करपाच्या उद्देशान घडोवन हाडिल्ल्या ह्या भोवविशेशज्ञ (मल्टिस्पेशालिटी) आयुर्वेदीक भलायकी तपासणी शिबाराचें उक्तावण मुख्यमंत्री डॉ. प्रमोद सावंत आनी भलायकी मंत्री विश्वजीत राणे हांचे हस्तुकीं जालें. ह्या वेळार मुख्यमंत्री उलयताले.
ही कार्यावळ गोवा कॉलेज ऑफ नॅचरोपॅथी आनी योगीक सायन्स हरवळे म्हाविद्यालयांत आयोजीत केल्ली. शिबिरांत लोकांक विवीध आयुर्वेद तज्ञां कडल्यान विनाशुल्क भलायकी तपासणी, सल्लो आनी उपचार सुविधा उपलब्ध करून दिल्यो. पचनसंस्था विकार, सांधेदुखी, कातीचें दुयेंस, ताण- तणाव ह्या विवीध दुयेंसांचेर आयुर्वेदीक उपचार आनी मार्गदर्शन केलें.
मुख्यमंत्र्यान सांगलें, सगल्या 40 मतदारसंघांनी अशे तरेचीं एकात्मीक भलायकी शिबिरां आयोजीत करून लोकांक बरी सुविधा दिवपाचो सरकाराचो हांवेस आसा. वाडट्या कॅन्सर, गोडेमूत आनी डायलिसीस दुयेंतींच्या आंकड्या विशीं मुख्यमंत्र्यान हुस्को उक्तायलो. दरेकल्यान नेमान भलायकी तपासणी करून दीर्घकाळ निरोगी रावपा खातीर यत्न करचे, असोय तांणी उलो मारलो. तशेंच आयुष दोतोरांची उपलब्धता वाडोवप, दुयेंतीं खातीर विनाशुल्क भलायकेची म्हायती दिवपी वॅबसायट सुरू करप आनी सिंगल विंडो सिस्टमी वरवीं विवीध भलायकी सेवा उपलब्ध करून दिवपाचें काम चालू आसा, अशेंय मुख्यमंत्र्यान सांगलें.
भलायकी मंत्री राणे हांणी सांगलें, अशा उपक्रमांक लागून लोकां मदीं भलायके विशीं जागरुकता वाडोवपाक मजत जातली आनी आयुर्वेदीक उपचार पद्दती वयलो विस्वास आनी घट जातलो. फाटल्या आठ वर्सांत गोंयांतल्या भलायकी आनी शिक्षण मळाचेर व्हड परिवर्तन घडयलां, रोजगार निर्मितीचेर लेगीत भर दिला. मुख्यमंत्री डॉ. प्रमोद सावंत हांणी सात वर्सांत बरें काम केलां. रोजगारभिमूख शिक्षणाचेर भर दिला. फुडल्या काळांत लेगीत अशेच तरेन गोंयच्या सर्वांगी उदरगती खातीर यत्न चालूच उरतले. येता ते वेंचणुकेंत लेगीत डॉ. सावंत हांच्या मार्गदर्शना खाला गोंयांत सरकार स्थापन करपाक योगदान दिवचें, असोय तांणी उलो मारलो.
ह्या शिबिराक थळाव्या लोकांचो उत्स्फूर्त प्रतिसाद मेळ्ळो. व्हड संख्येन लोकांनी भलायकी शिबिराचो लाव घेतलो. कार्यावळीक डॉ. सुजाता कदम, निलेश कोरडे, मिताली जोशी, पांडुरंग कुट्टीकार, संतोष मळीक, डॉ. स्नेहा भागवत तशेंच हेर दोतोरांचो पंगड उपस्थीत आशिल्लो. मुख्यमंत्री डॉ. सावंत हांणी प्रॉग्रेस हायस्कुलांत विद्यार्थ्यांक मार्गदर्शन केलें आनी तांचे वांगडा वाडदिसाचो केक कांपलो. रवींद्र भवनांत डॉ. सावंत हांच्या वाडदिसा निमतान रांगोळी आनी चित्रकला प्रदर्शन आयोजीत केल्लें. गोंयच्या विवीध भागांतल्यान लोकांनी मुख्यमंत्र्याक शुभेत्सा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
