भांगरभूंय | प्रतिनिधी
रंगकर्मी अभिराम भडकमकर करतले मार्गदर्शन
पणजी: गोवा कोंकणी अकादेमीन, कोंकणी नाटक संगीत अकादेमी आनी थॉमस स्टीवन्स कोंकणी केंद्र हांच्या जोडपालवान कोंकणी नाट्य क्षेत्रांतल्या आमंत्रीत लेखकां खातीर एक खास ’कोंकणी नाट्य लेखन शिबीर’ घडोवन हाडलां. हें शिबीर ३० एप्रील ते २ मे २०२६ ह्या काळांत थॉमस स्टीवन्स कोंकणी केंद्र, पर्वरे जातलें.
ह्या शिबिराचे मुखेल मार्गदर्शक म्हणून नाट्यलेखक, दिग्दर्शक आनी अभिनेते अभिराम भडकमकर मार्गदर्शन करतले. अभिराम भडकमकर हे रंगभूंय आनी चित्रपट सृश्टींतले एक प्रतिभावंत व्यक्तिमत्व. दिल्लीच्या नॅशनल स्कूल ऑफ ड्रामा हांगच्यान तांणी नाट्यशास्त्राचें प्रशिक्षण घेतलां. तांणी ’बालगंधर्व’, ’पछाडलेला’, ’खबरदार’ सारक्या सुमार ३० चित्रपटांचें लेखन केलां, तशेंच ’देहभान’, ’ज्याचा त्याचा प्रश्न’, ’वानप्रस्थ’ सारकीं १२ गाजलेलीं नाटकां बरयल्यांत. तांची नाटकां हिंदी, गुजराती आनी कन्नड भाशेंतय सादर जाल्यांत.
फक्त लेखनापुरतेंच मर्यादीत रावनासतना, तांणी ’चाणक्य’, ’सैलाब’ सारक्या मालिकांनी आनी जायत्या चित्रपटांनी अभिनय केला. ’असा हा बालगंधर्व’, ’ऐट एनी कॉस्ट’ आनी ’सीता’ सारक्यो तांच्यो कादंबर्यो खूब गाजल्यांत. तांच्या कलेची दखल घेवन तांकां महाराष्ट्र सरकाराचे जायते पुरस्कार, झी गौरव, मटा सन्मान आनी नाट्य मळार सगळ्यांत मानाचो ’संगीत नाटक अकादमीचो राष्ट्रपती पुरस्कार’ मेळ्ळा.
कोंकणी नाटकांची मांडणी, संवाद लेखन आनी नाट्य तंत्रांत सुदारणा करपाच्या उद्देशान गोवा कोंकणी अकादेमीन हें शिबीर आयोजीत केलां. हें शिबीर फक्त आमंत्रितां खातीर आसून, कोंकणींतल्या निवडक नाट्यकर्मींक नामनेच्या मार्गदर्शका कडल्यान नाट्य लेखनाचे बारकावे शिकपाची संद मेळटली. नाट्य मळावयल्या रसिकांनी आनी संबंदितांनी ह्या उपक्रमाची नोंद घेवची, असो उलो गोवा कोंकणी अकादेमीन मारला.
#Goa #Panjim #GoaKonkaniAcademy #ThomasStevensKonkaniKendra
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
