भांगरभूंय | प्रतिनिधी
सध्याचे वेगान चलपी जिणे पद्दतींत जायते जाण घाईन नाश्तो करतात, ना तर केन्ना केन्नाय तो करिनासतनाच घरा भायर सरता. कांय जाणांक नाश्त्याक तळिल्लें, तेलकट अन्न खावपाक आवडटा. पूण ह्यो संवयो भलायकेक सामक्यो वायट थारपाक शकतात. नाश्तो दिसाचो सगल्यांत म्हत्वाचो आनी मुखेल जेवण मानतात आनी सारकें खाल्यार पुराय दीस उर्जा मेळटा. अशे परिस्थितींत कितें खावचें आनी कितें खावचें न्हय हें फौजिया अन्सारी, डायटिशियन, अपोलो स्पेक्ट्रा रूग्णालय, मुंबय हांणी सांगलें.
भाजी, वडे, पुरी वा कितेंय तेलान तळिल्लें जेवण जरी रुचीक आसलें तरी तातूंत तेल खूब चड आसता. सकाळीं रिकाम्या पोटानर अशे पदार्थ खाल्यार पचन तंत्राचेर ताण येता. हाका लागून ऍसिडीटी, अपचन, जडपण आनी सुस्तताय येवंक शकता. हाचे भायर तळिल्ल्या खाणांत ट्रान्स फॅट्स आनी कॅलरीज चड प्रमाणांत आसतात, जाका लागून वजन वाडपाची शक्यताय वाडटा आनी दीर्घकाळ सेवन केल्यार काळजाच्या दुयेंसांचोय धोको निर्माण जावंक शकता.
उरफाटें निरोगी नाश्तो कुडीक खूब फायद्याचो आसता. समतोल नाश्त्यांत प्रोटीन्स, फायबर, व्हिटामिन्स आनी मिनरल्स आसपावपाक जाय. देखीक, फोव, उपमा, ओट्स, फळां, धंय, तांतयां वा बहुधान्य आशिल्ल्या भाकरी सारकिल्ल्या खाणांक लागून कुडीक गरजेचें पोशण मेळटा. हें जेवण पचपाक सोपे आसतात आनी तातुंतल्यान दीर्घकाळ तिगून उरपी उर्जा मेळटा.
निरोगी नाश्तो केल्यार मेंदवाचें काम सुदारता, एकाग्रताय वाडटा आनी कामाचे सुवातेर उत्पादकता वाडटा. सकाळीं पुश्टीक नाश्तो खूब म्हत्वाचो, खास करून विद्यार्थ्यां खातीर आनी काम करपी लोकां खातीर. तशेंच, सारको नाश्तो केल्यार दीसभर गरजे भायर उपासमारी उणी जाता, जाका लागून जंक फूड खावपाची संवय उणी जाता.
नाश्तो सोडून दिल्यार कुडीची मॅटाबॉलीजम प्रक्रियाय मंद जाता, जाका लागून वजन वाडटा आनी थकवो येता. देखून पुश्टीक आहारान दिसाची सुरवात जावप सदांच गरजेची आसता. सकाळीं हळुवार पूण पुश्टीक नाश्तो केल्यार कुडीक ताजेपण येता आनी रोगप्रतिकार शक्तूय घटमूट जाता.
दरेकल्यान पयलीं आपले भलायकेक प्राधान्य दिवपाची गरज आसा. केन्ना केन्नाय तळिल्लें जेवण खावप बरोबर आसलें तरी दिसपट्ट्या नाश्त्यांत तें टाळचें. ताचे बदला समतोल आनी निरोगी नाश्तो खावन आमी निरोगी जिवीत जगूंक शकतात आनी दिसाची निरोगी सुरवात करूं येता.
#HealthNews #Morning #Breakfast
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
