भांगरभूंय | प्रतिनिधी
जाल्यार हो कॉमनसेन्स वाडटा तरी कसो? म्हज्या मतान दुसऱ्यांक पळोवन, तांचे व्हड विचार आयकून, तांचे कडेन उलोवन आनी स्वताच कांय गजालींचो अणभव घेवन.
काॅमनसेन्स म्हणल्यार कितें? हो प्रस्न म्हाका खुबश्या वेळार पडटा. हरशीं म्हज्या सगळ्यांच प्रस्नांची जाप म्हाका सदांच म्हजे मम्मा कडल्यान मेळटा म्हणून हो प्रस्न लेगीत हांवे तिकाच विचारपाचें थारायलें. मम्मा कॉमनसेन्स म्हणल्यार कितें गे? तिणें म्हणलें “common sense is the ability to perceive, understand and judge things correctly”. कॉमनसेन्स म्हणल्यार सामान्य बुद्धी. मम्मान सांगिल्ल्या ह्या वाक्यान तर हांव चडूच घुस्पलो. मनीस बुदवंत आसलो म्हूण जायना, मनशाक सामान्य गजालींचे ज्ञान आसप खूब गरजेचें. आपूण कितें करता? कसो वागता? कितें उलयता? ह्यो गजाली तांकां कळपाक जाय.
आजकाल मनीस रेस्पेद सोदता, पूण ताका तो घेवपाक कळना. तो रेस्पेद तो स्वताच व्हगडायता. कॉमनसेन्स बाजारांत मेळपी वस्त न्ही, कितलोय लेगीत पयसो आसलो तरी आमी विकत घेवंक शकना. ना कोणा कडल्यान ‘दी रे म्हाका पॅनट म्हणटात तशें ‘दी रे म्हाका मात्शें कॉमनसेन्स’ म्हणून मागुनय घेवंक शकनात. जाल्यार हो कॉमनसेन्स वाडटा तरी कसो? म्हज्या मतान दुसऱ्यांक पळोवन, तांचे व्हड विचार आयकून, तांचे कडेन उलोवन आनी स्वताच कांय गजालींचो अणभव घेवन.
एक दीस हांव शाळेक वचपाक गणवेश घालून, फाटीर बॅग मारून भायर सरलो. म्हजो पापा गाडी भायर काडटा म्हूण हांव गॅटी कडेन रावलो. शेजारचो काका म्हाका विचारता “बाबू स्कूलाक वता रे” आतां शाळेचो गणवेस घालून आनी फाटीर बॅग मारून हांव स्कूलाक न्हय तर खंय वतलो काय? हांव हांसलो हय म्हणलें आनी वोगी रावलो.
आनीक एक आयकात. एक दीस हांव मांडार गेलों, दुदाची पोती घेतली आनी घरां येतालों. दुदाची पोती हें सामकी कळटालें. वाटेर आमच्या वाड्यार रावपी काकी मेळ्ळी. म्हणपाक लागली “बाबू कितें हाडलें रे”? हांवे तिका ती पोती दाखयत म्हणलें ‘ही पळय दुदाची पोती’. आनी हांव म्हजे भितरूच हांसून चलत रावलों.
एकदा तरी अशी गजाल घडली हांव आनी मम्मा हॉटेलांत गेल्ली. थंय आमकां एक पयशिल्लो सोयरो दुसऱ्या मेजार जेवपाक बशिल्लो हटकुपाक लागलो आनी ताणें म्हणलें “ ह्या हॉटेलांत खायत जाल्यार जिवाक सामकें माल पडटा”. हांवे ताका पळयलो, ताचे ऑडर केल्ली तंदुरी पळयली. आनी विचार केलो हो कसलो ‘सेन्स’ आसतलो काय ?
शौर्य ब्रिजेश म्हापसेकार
यत्ता- सवी आमोणकार विद्यामंदीर, म्हापशें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
