पुस्तका वयल्यान वाद

भांगरभूंय | प्रतिनिधी

शिवाजी महाराजांचो एकेरी उल्लेख केलोच कसो, हो ह्या वादाचो मुखेल मुद्दो.

अामच्या देशांत वादांक मरण ना. कांय वाद आपशीच तयार जातात, तर कांय मुद्दाम. कांय समाजविद्वाटे, धोंगी तें कारस्थान करतात. जिणेगरजेच्या मुद्द्यां वयल्यान लोकांचें लक्ष दुसरे कडेन वच्चें म्हूण कांय धूर्त कोलेय ल्हवूच वादाचें पील सोडटात. हातूंत समाजमन दुशीत जाता, गरजे भायर तणाव वाडटा. समजांत उबी फूट पडटा. तेन्ना शाण्या मनशांनी वाद मिटोवपाचो यत्न करपाक जाय, कोणाच्या तरी सांगण्या वयल्यान तातूंत तेल ओतपाक जायना. सां फ्रान्सीस झेवियराक उद्देशून नाका जाल्लीं उतरां उलयिल्ल्यान आमच्या गोंयांत वाद तेंगशेर पावला. शेजराच्या महाराष्ट्रांत छत्रपती शिवाजी महाराजां वयल्या पुस्तकाचेर वाद पेटला. अर्थांत गोंयचे तुळेन तो तितलो गंभीर ना. मात महाराजांचे बाबतीत मराठी लोक सामके संवेदनशील आशिल्ल्यान तो वाडपाक शकता.
आमच्या देशांत दोन म्हापुरसांच्या पुतळ्यां वयल्यान हिंसाचार जाता. मजेची गजाल म्हणल्यार ह्या दोगां परस चड पुतळे आशिल्ल्या म्हापुरसाक थोडे फांतोडेर जागे जायत सावन न्हीद मेरेन खेपतात, पूण ताच्या समर्थकांनी केन्नाच हिंसाचार करूंक ना, सोडून ताची हत्या जाले उपरांतचे कांय दीस!! बुलढाणाचे 2019 सावन आमदार आशिल्ले संजय गायकवाड (शिंदे शिवसेना) हांणी कोल्हापूरांतले प्रकाशक प्रशांत आंबी हांकां धमकी दिल्या. ‘शिवाजी कोण होता?’ ह्या काॅम्रेड गोविंद पानसरे हांच्या पुस्तका वयल्यान. ‘पानसरे कोण आनी ताचे कितें हाल केले, तें खबर आसा मरे तुका? तुजेय तेंच हाल करतले’, अशी धमकी दिल्ल्याचो आॅडियो व्हायरल जाला. आंबी आनी पानसरे कुटुंबान पुलिशेंत कागाळ केल्या. गायकवाड म्हणटात, ‘म्हज्या उतरांची मोडतोड केल्या.’ सत्य कितें ते पुलीस सोदतलेच. पूण आमदारान धमकी दिवपाचो म्हुर्तूय बरो सोदून काडलो म्हणपाचो. पुस्तक दिसाचो.
पानसरे हांचो 2015 त पुण्यां खून केल्लो. बारा जाणांचेर आरोप जाल्ले. थोड्यांक धरिल्ले. ते जामिनाचेर सुटल्यात. थोडे फरारी आसात. हे केशीचो निमणो निर्णय अजून लागूंक ना. पानसरे हांणी ‘शिवाजी कोण होता?’ हें पुस्तक बरयलां. ताच्यो हजारांनी प्रती, पिडीएफ काॅपी अजून फाॅरवर्ड जातात. भोवजन समाजाचो राजा, सर्वधर्मसमभाव मानपी मनीस, जात- पात, धर्म पळयनासतना फक्त मनशाची कुशळटाय, निश्ठा पळोवन ताका काम दिवपी अशें वास्तव चित्रण लेखकान केलां. एकूणच महाराजांच्या इतिहासाचे मांडणी वयल्यान दोन विचारसरणीं मदीं फाटलीं बरींच वर्सां चलपी हो वाद, संघर्श. शिवाजी महाराजांचो एकेरी उल्लेख केलोच कसो, हो ह्या वादाचो मुखेल मुद्दो. पानसरे पुरोगामी आनी दाव्या विचारांचे. म्हणटकच धर्म, रुढी, परंपरा मानपी उजवे तांच्या विरोधांत. आमदारान ज्या पुस्तका वयल्यान धमकी दिल्या तें 1988 त उजवाडाक आयिल्लें. तातूंत लेखकान महाराजांक सेक्युलर आनी लोकाभिमूख प्रशासक म्हणलां. ‘लेखकान इतिहास विकृत केला. महाराज सेक्युलर नाशिल्ले, तर ते हिंदू राजा आशिल्ले, एकेरी उल्लेख, लेखनाची मांडणी महाराजांचो अनादर करपी’, असो तांचो दावो. देखून तें पुस्तक पुराय नश्ट करचें, अशें ते म्हणटात. तर बुद्धीजिवींचें मत, ‘हें विचारप्रवर्तक, संशोधनात्मक पुस्तक. शिर्शक वाचून निश्कर्श काडचो न्हय, विचारांक विचारान जाप दिवची. महाराज धर्मनिरपेक्ष, दूरदिश्टी आशिल्ले गुणी राजा आशिल्ले.’ ह्या दोन विचारसरणी मदीं पेटलां तें बंद जावपाचें नांव घेना. छत्रपती शिवाजी महाराज हो सगल्यांचोच श्रद्धेचो, अभिमानाचो विशय. तांचो आदर्श मात कोण घेवपाक पळयनात. शिवाजी महाराज हो खूब संवेदनशील मुद्दोय. पोरूं गोंयांत पसून तांचे वयल्यान वादाची कीट पेटिल्ली.
अभिव्यक्ती स्वातंत्र्या आड इतिहासीक, सांस्कृतीक भावना अशे वाद पेटल्यात, आनी फुडाराकूय पेट्टले. हाचेर तथ्यांचेर आदारीत भासाभास, संयम आनी कायदेशीर मार्ग हेच बरे उपाय आसात.