भांगरभूंय | प्रतिनिधी
पणजी : गोंय मानवी संसाधन विकास महामंडळा (जीएचआरडीसी) वरवीं आयोजीत केल्ल्या पयल्या भव्य खासगी क्षेत्र रोजगार मेळाव्यावरवीं सुमार १३०० उमेदवारांची पयल्या टप्प्यांत निवड करतले. ह्या वेंचून काडिल्ल्या उमेदवारांक १ मे पयलीं नियुक्तीपत्रां दितले आनी २ मे सावन ते प्रत्यक्ष कामार रुजू जातले, अशी घोशणा मुख्यमंत्री डॉ. प्रमोद सावंत हांणी आयज केली. वेर्णा उद्देगीक वसणुकेंत आयोजीत ह्या विशेश रोजगार मेळाव्याच्या उक्तावणा वेळार ते उलयताले. गोंयच्या तरणाट्यांक उद्देगां कडेन सरळ जोडप आनी तांच्या करिअराक शाश्वत गती दिवप, हो ह्या उपक्रमाचो मुखेल हेतू आशिल्ल्याचें तांणी सांगलें.
जीएचआरडीसीन आयोजीत केल्ल्या ह्या पयल्याच व्हड खासगी रोजगार मेळाव्याक तरणाट्यांचो बरो प्रतिसाद मेळ्ळा. ६,००० परस चड उमेदवारांनी हे खातीर नोंदणी केल्ल्यान सुमार ३,००० तरणाटे प्रत्यक्षांत हाजीर रावले. उद्देगीक वसणुकेंतल्या २५ आघाडीच्या कंपन्यांनी मुलाखतींची प्रक्रिया सुरू केल्या. फुडले १० दीस ही प्रक्रिया चालूच उरतली. जे उमेदवार पयल्या टप्प्यांत निवडचे नात, तांकांय परत संद दितले, अशी गवाय मुख्यमंत्र्यांनी दिली.
गोञयच्या दरेका तरणाट्याक रोजगाराची संद उपलब्ध करून दिवपा खातीर सरकार कटिबद्ध आशिल्ल्याचें तांणी नमूद केलें.
२०१४त स्थापन जाल्ल्या जीएचआरडीसी महामंडळाच्या प्रवासाचेर उजेड घालतना मुख्यमंत्र्यान म्हणलें, ज्या क्षेत्रांत आदीं बिगर गोंयकार कामगारांचें वर्चस्व आशिल्लें, थंय आतां गोंयचे तरणाटे मानान काम करतात. सुरक्षा रक्षक आनी हाऊसकीपिंगा सारकिल्ल्या सेवांनी आयज आमचे तरणाटे आत्मविस्वासान वावुरतात. महामंडळां वरवीं तीन म्हयन्यांचें विशेश प्रशिक्षण दिता, तशेंच ह्या नोकर्यां वांगडा ईएसआय, भविष्य निर्वाह निधी आनी नियमीत पगार वाडीचे लावूय मेळटात. विशेश म्हळ्यार, महामंडळांत दोन वर्सां सेवा पुराय करपी कर्मचार्यां खातीर सरकारी नोकर्यांनी २० टक्के आरक्षण दवरलां. हालींच महामंडळाचे ४० कर्मचारी पुलीस दळांत भरती जाले, ही राज्या खातीर अभिमानाची गजाल आशिल्ल्याचें तांणी सांगलें.
खाजगी क्षेत्रांत नोकरी सुरक्षे विशीं उलयतना मुख्यमंत्र्यान स्पश्ट केलें, म्हामंडळ उद्देग आनी कर्मचार्यां मदलो दुवो म्हूण वावुरता. हाका लागून कर्मचार्यांचो पगार आनी स्थिरताय हांची जापसालदारकी म्हामंडळाचेर आसता. जायते फावटीं १२ वे उपरांत जोडपी तरणाटे पदवी पुराय करून सरकारी नोकर्यांनी स्थीर जातात. अशा तरणाट्यांक शिश्यवृत्ती आनी शुल्क सवलत दिवन सरकार तांच्या शिक्षणाक आदार दिता. सध्या ५ हजारां परस चड तरणाटे सुरक्षा रक्षक, ड्रायव्हर, संगणक संचालक, कनिश्ट अधिकारी अशा वेगवेगळ्या पदांचेर काम करतात.
हांवें स्वता चार हजारां पसून सुरुवात केली : मुख्यमंत्री
खंयचेंच काम ल्हान नासता, असो मोलाचो सल्लो दितना मुख्यमंत्र्यांनी स्वताच्या करिअराची याद काडली. ‘हांवें स्वता वैजकी अधिकारी म्हणून ४,००० रुपयांच्या पगाराचेर कामाची सुरुवात केल्ली.’ अशें सांगून तांणी तरणाट्यांक मानसिकताय बदलपाचो उलो मारलो. आयज मल्टी टास्किंग स्टाफ आनी लोअर डिव्हिजन क्लर्क सारक्या सरकारी पदां खातीरूय खासगी मळार अणभवाक म्हत्व दितात. खासगी मळार एक वर्स पुराय करपी उमेदवारांक सरकारी नोकरेंत प्राधान्य दिवपाचें धोरण सरकारान स्विकारलां.
स्वरोजगारा खातीर सरकार ईडीसी वरवीं ४ ते ५ टक्के व्याजाचेर रीण, ईडीआय वरवीं प्रशिक्षण आनी आयटी खात्या खाला स्टार्टअपांक १० लाख रुपया मेरेन अनुदान दिता. तशेंच गोंयच्या तरणाट्यांनी पर्यटन आनी उद्देगीक मळार वाडत वचपी संद वेळार हातांत घेवची, नाजाल्यार हेर लोक हे संदीचो फायदो घेतले अशी शिटकावणी तांणी दिली. उद्देगीक वसाहतींतल्या कर्मचार्यांच्या सोयी खातीर बशी सेवाय वाडत आसात. मुळावी बांदावळ आनी संदी उपलब्ध आसा, आतां तरणाट्यांनी कश्ट आनी सुसंगतीन स्वताचो फुडार तयार करचो अशें डॉ. प्रमोद सावंत हांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
