भांगरभूंय | प्रतिनिधी
देवीचे आशीर्वाद आनी वेवस्थापनाक लागून जात्रा निर्विघ्न : मुख्यमंत्री
पणजी : शिरगांवच्या लयराय देवीचे जात्रेंत फुडल्या वर्सा लेगीत अशेच तरेचे निर्बंद आनी खर सुरक्षा वेवस्था आसतली. पयलेच दिसा निर्बंद आसतले, अशें मुख्यमंत्री डॉ. प्रमोद सावंत हांणी सांगलां. देवी लयरायेचो आशीर्वाद आनी वेवस्थापन हाका लागून अंदूचो जत्रोत्सव निर्विघ्नपणान पार पाडलो. म्हाका हे गजालीचें समाधान आसा, अशें मुख्यमंत्री डॉ. सावंत हांणी सांगलें.
उत्तर गोंय जिल्लोधिकार्यांच्या फुडारपणा खाला मामलेदार, पुलीस हांचो पंगड रातभर नदर दवरून आशिल्लो. गर्दीचेर नियंत्रण दवरपा खातीर पयलीं सावन नियोजन केल्ले. देवी लयरायेच्या आशीर्वादान ह्यान फुडें लेगीत जात्रा अशीच निर्विघ्नपणान जावची, अशी प्रार्थना डॉ. सावंत हांणी केल्या.
शिरगांव जात्रे खातीर आतां निर्बंध शिथील केल्यात. पयले दिसा उपरांत गर्दी उणी जाता. हाका लागून वेवस्थापना खातीर स्थापन केल्लो नियंत्रण कक्ष बंद जाला. सीसीटीव्ही कॅमेरेे आसात. सीसीटीव्ही कॅमेर्यांची फुटेज आतां देवस्थान समितीक वता, अशी म्हायती उत्तर गोंयचे जिल्होधिकारी अंकीत यादव हांणी दिली. दुकानांच्या संख्येचेर आशिल्ले निर्बंद लेगीत आतां शिथील जाल्यात, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
