भांगरभूंय | प्रतिनिधी
कार्यावळीच्या आयोजकांचेर खर कारवाय करपाची मागणी
पणजी : सेंट फ्रान्सिस झेवियर हांचे विशीं आक्षेपार्ह आनी वादग्रस्त वक्तव्य करपी गौतम खट्टर हांचे आड गोंयांत तिडकीचें वातावरण निर्माण जालां.गौतम खट्टर तशेंच कार्यावळीच्या आयोजकांक बेगोबेग अटक करची, हे मागणे खातीर बिरेस्तारा शेकड्यांनी लोकांनी वास्को पुलीस स्टेशनाचेर धडक मोर्चा काडलो. ह्या वेळार तिडकल्ल्या आंदोलकांनी पुलिसांचे भुमिकेचेर प्रस्न करून नेटान घोशणा दिल्यो.
मेळिल्ले म्हायती प्रमाण, टिळक मैदानार जमिल्ल्या शेकड्यांनी नागरिकांनी पदयात्रा करून पुलीस स्टेशनार पावले. आंदोलकांचो असो दावो आसा, पुलिसांनी मुखेल आरोपी गौतम खट्टराक सोडून फकत ताचो भाव माधव खट्टर हाका अटक केल्या. जो मेरेन मुखेल आरोपी आनी हे कार्यावळीचें आयोजन केलें तांचेर खर कायदेशीर कारवाय जायना, तो मेरेन शांत बसचे नात, अशें आयोजकांनी थारायलां
ह्या वेळार परिस्थितीची खराय वळखून पुलीस अधीक्षक गुरुदास कदम हांणी आंदोलकां कडेन संवाद सादलो. ह्या प्रकरणाचो तपास आतां खोलायेन करपा खातीर तो राज्य गुन्यांव फांट्या कडेन दिला. वास्को पुलीस आतां फकत ह्या तपासांत गुन्यांव फांट्याक सहकार्य करतात, अशें स्पश्टीकरण अधीक्षक कदम हांणी दिलें. गुन्यांव फांट्याचो पंगड उत्तराखंडांत पयलींच तैनात आशिल्ल्यान आरोपी दिसतांच ताका अटक करतले, अशें आस्वासनूय तांणी ह्या वेळार दिलें.
माधवाक गोंयांत हाडलो
मजगतीं, वास्को पुलिसांनी गौतम खट्टर हाचो भाव माधव हाका हरिद्वार, उत्तराखंडांत अटक केल्या. बुधवारा उसरां विमानान ताका मोपा विमानतळार हाडलो. तपासा मजगतीं एक धक्को दिवपी गजाल मुखार आयली ती म्हळ्यार, समाजांत तिडक निर्माण करपी तें वादग्रस्त भाशण माधवानूच बरोवन दिल्लें. गौतम खट्टराचे कार्यावळीचें सगलें नियोजन, प्रवासाची वेवस्था आनी मानधनाचे वेव्हार माधवूच सांबाळटालो. इतलेंच न्हय, हें भाशण स्वताच्या मोबायलार रेकॉर्ड करून सोशल मिडियाचेर व्हायरल करपांतूय ताचोच हात आशिल्ल्याचें कळ्ळें.
सध्या माधव खट्टर वास्को पुलिसांच्या ताब्यांत आसा. ताची खोलायेन चवकशी करप चालू आसा. तांणी दिल्ले म्हायती वेल्यान गौतम खट्टर मेरेन पावपाचो पुलीस यत्न करता. आंदोलकांनी स्पश्ट केलें, गोंयचो धर्मीक एकवट इबाडपी प्रवृत्तींक फाटीं घालपी आयोजकांचेरूय गुन्यांव दाखल जावंक जाय. ह्या मोर्चाक लागून वास्को शारांत कांय काळ तणावाचें वातावरण निर्माण जाल्लें. आतां तपास गुन्यांव फांट्या कडेन गेल्ल्यान आरोपीक केन्ना धरता हाचे कडेन पुराय गोंयचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
