भांगरभूंय | प्रतिनिधी
आयज वाचनाच्या उणावाक लागून समाजांतल्यान नैतीक मुल्यां शेणत चल्ल्यांत. ताका लागून नवे पिळगेन परतून एकदां वाचन संस्कृती कडेन वळप ही काळाची गरज आसा.
आयज 23 एप्रील. आयचो दीस पुराय संवसारांत संवासरीक पुस्तक दीस म्हूण मनयतात. विल्यम शेक्सपियर, मिग्युयल सर्वांटीस, इंका गार्सीलोसो ह्या संवसारांतल्या नामनेच्या मनशांक ह्या दिसा मरण आयलें. तांकां आर्गां ओंपपा खातीर युनेस्कोन 23 एप्रील हो दीस संवसारीक पुस्तक दीस म्हूण जाहीर केलो. हो दीस पयले फावटी 23 एप्रील 1923 ह्या दिसा स्पेनांतल्या पुस्तक विक्रेत्यांनी मनयलो. स्पेनांत मिगेल डे सर्वांटीसच्या यादी खातीर हो दीस मनयलो. उपरांत 1995 वर्सा पॅरिसांत युनेस्कोची साबार बसका जाली. जातूंत संवसारभरांतल्या लेखकांक आर्गां ओंपपा खातीर आनी पुस्तकां मदीं रस निर्माण करपा खातीर संवसारीक पुस्तक दीस दरेक वर्सा मनयतले असो निर्णय घेतलो. वाचन संस्कृतीच्या चर्चे बगर पुस्तक दीस मनोवंकूच शकना. चलात तर मागीर वाचन संस्कृती विशयाचेर चर्चा करुया आनी पुस्तक दीस मनोवया.
आयच्या मोबायल, इंटरनेट, सोशल मिडियाच्या युगांत विद्यार्थ्यांचें वाचन कमी जायत चल्लां. पयलीं विद्यार्थ्यां मदीं जशी वाचनाची आवड आशिल्ली तशी आवड आयच्या विद्यार्थ्यां मदीं दिसून येना. आयच्या सोशल मिडिया आनी इंटरनेटाच्या युगांत पुस्तकां वाचपाचें प्रमाण दिसानदीस उणें जायत चल्लां. विद्यार्थ्यां मदीं अवांतर वाचनाची गोडी उणी जायत चल्ल्या. साहित्य संमेलनां मदीं पुस्तकांची विक्री उणी जावं लागल्या. पयलीं गर्देन भरिल्लीं वाचनालयां आतां रितीं रितीं दिसूंक लागल्यांत. ग्रंथालयांतलीं पुस्तकां वर्सां कणकणीं एके सुवाते वेल्यान दुसरे सुवातेर हालनात. हाचे वेल्यान दिसून येता की आतांची पिळगी कितलीं पुस्तकां वाचतात तीं. आयची पिळगी सोशल मिडियाच्या आहारी गेल्ल्यान पुस्तकां पसून पयस वचत चल्ल्यांत. सोशल मिडियाक लागून वाचन संस्कृती सोंपत चल्ल्या. वाचन संस्कृती तिगोवपा खातीर तशेंच विद्यार्थ्यां मदीं वाचनाची आवड निर्माण करपा खातीर पुस्तक दिसा सारक्या उपक्रमांचें आयोजन जावंक जाय.
आयच्या युगांत ज्ञान ही खूब व्हड शक्त आसा, हाचोच आमकां विसर पडला. वाचनाक लागून आमकां इतिहासाचें ज्ञान, वर्तमानाचें भान आनी फुडाराचो वेध घेवंक मेळटा. ज्ञान मेळोवपाचें प्रभावी साधन म्हणल्यार वाचन. सेगीत वाचन केले उपरांत मनशाची ग्रहण क्षमता आनी स्मरणशक्त चडांत चड सशक्त जावन बुद्धिमत्ता चडांत चड प्रगल्भ जाता. तातूंतल्यान मनशाच्या विचार पातळेचो चारुय दिकांनी विकास जाता. वाचनाक लागूनच मनशाच्या व्यक्तीमत्वाची जडणघडण जाता. वाचनाक लागून मनीस सुसंस्कृत जाता. बरें आसा तें वाचीत जाल्यार आनी बरें तें आयकत जाल्यार मनशाचे विचार विवेकशील आनी प्रगल्भ जातात. तातूंतल्यान आपली मनोभावना शुद्ध जाता. तशेंच भाशा आनी वक्तृत्व विकसीत जाता. वाचनाक लागून व्यक्तीमत्व फुलून वता. वाचन ही जिवीत वाडोवपी कार्यावळ. हाका लागून बुद्धीची वाड जाता. मनशाची जीण फुलोवपाक वाचनाचो मोटो वांटो आसता. ताका लागून वाचनाचो छंद वाडोवन आमचें जिवीत समृद्ध करपाक जाय. मना वयलो ताण उणो करपा खातीर पुस्तकांच्या सहवासांत रमूंक जाय. बऱ्या पुस्तकांचो, विचारांचो आपले जिणेचेर सकारात्मक परिणाम जाता आनी आयुश्या कडेन पळोवपाचो आमचो दिश्टीकोन कायमचो बदलून वता. पुस्तकांक लागून कमकुवत मनाक धीर मेळटा. ताका लागून निरशेवणेचे गर्तेंत आडकून उरिल्लो मनीस हत्या, आत्महत्या करपा पसून परावृत्त जाता. आयज काल तरणाट्यांक खूब ताण आसता. हो ताण उणो करपाचें प्रभावी माध्यम म्हणल्यार वाचन.
डॉ. बाबासाहेब आंबेडकर सदांच म्हणटाले. पुस्तकां वाचल्यार अशक्त मस्तक सशक्त जाता आनी सशक्त मस्तक कोणा मुखारूय दोळे बंद करून नतमस्तक जायना. स्वामी विवेकानंद, महात्मा फुले, डॉ. बाबासाहेब आंबेडकर, भगतसिंग हांचे सारक्या महापुरसांचे जिणेचो वाचनाक लागून बदल जालो. इतिहासीक पुस्तकांक लागून वाचकांच्या मनांत देशभक्ती निर्माण जाता. कथा, कादंबरी हाका लागून वाचकांच्या मनांत मनीसपणाचे भाव जागृत जातात. काव्य वाचनांतल्यान आमच्या मनांत संवेदनशीलताय निर्माण जाता. व्हड व्हड मनशांचीं चरित्रां वाचून प्रेरणा मेळटा. दिसाळीं वाचिल्ल्यान समाजीक जाणीव निर्माण जाता. एकूणच वाचनाक लागून मनीस सर्वगूण संपन्न जाता. तांचे मदीं नैतीक मुल्यांची रुजवण जाता. आयज वाचनाच्या उणावाक लागून समाजांतल्यान नैतीक मुल्यां शेणत चल्ल्यांत. ताका लागून नवे पिळगेन परतून एकदां वाचन संस्कृती कडेन वळप ही काळाची गरज आसा. आपल्या आनी समाजाच्या फायद्या खातीर वाचन संस्कृती तिगोवन दवरूंक जाय. वाचन करीत जाल्यार वाटावतले हे उक्ती प्रमाण तरणाटे पिळगेक वाटावपाचें आसत जाल्यार तांचे मदीं वाचन संस्कृती रुजोवंक जाय. ते खातीर पुस्तक दिसा सारके उपक्रम फायदेशीर थारतले.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
