भांगरभूंय | प्रतिनिधी
भांगरभूंय । प्रतिनिधी
पणजीः दृश्टी जीवरक्षक आनी बीच मार्शल हांणी सप्तकाचे निमण्या आयतारा मेरेन गोंयच्या दर्यादेगेर आनी दूदसागर घसघशाचेर जाल्ल्या वट्ट 13 घडणुकांक प्रतिसाद दिलो. हातूंत स बचावकार्या, एक वैजकी आपत्कालीन घडणूक, तीन शेणिल्ल्या भुरग्यांचो सोद आनी चोरी अशा घडणुकांचो आस्पाव आसा.
आश्वें दर्यादेगेर दिल्लीच्या 43 वर्सा पिरायेचे बायलेक अचकीत श्वास घेवपाक त्रास जावपाक लागले. उपरांत जीवरक्षकांनी रोखडीच घडणूक थळार धांव घेवन तिका ऑक्सिजन दिवन थीर केली. दुसरे एके घडणुकेत आंध्र प्रदेशाची 37 वर्सा पिरायेची बायल न्हांवतना खोल उदकांत गेली. उपरांत जीवरक्षकांनी तिका सुरक्षितपणान दर्यादेगेर हाडली आनी बुडपा पसून वाटायली.
हणजूणां दर्यादेगेर हैदराबादचो 17 वर्सा पिरायेचो चलो खोल उदकांत आडखून उरलो आनी भायर सरपाक ताका त्रास जावपाक लागले. ताका वाटोवपाक जीवरक्षकांक येस फावो जाले. बागा दर्यादेगेर शेणिल्ले पांच वर्सा पिरायेचे चलयेक जीवरक्षकांनी सोदून तिका सुरक्षितपणान पालकांच्या स्वाधीन केले.
कळंगूट दर्यादेगेर बिहारचो 25 वर्सा पिरायेचो मनीस सोरो पिवन उदकांत गेल्या कारणान तो लाऱ्हांनी आडखून उरलो. जीवरक्षकांनी उदकांत धांव घेत ताका वाटयलो. दुसरे एके घडणुकेत, बेळगांवचें चार वर्सा पिरायेचें शेणिल्ल्या भुरग्याक जीवरक्षकांनी सोदून ताच्या कुटुंबा कडेन दिलें.
कोलव्या दर्यादेगेर कर्नाटकाचे 15 वर्सा पिरायेचे चली दर्यांत न्हांवतना तिचे गळ्यांत उदक गेले आनी तिका श्वास घेवपाक त्रास जावपाक लागले. जीवरक्षकांनी रोखडेच वैजकी मदत दिवन तिका फुडल्या उपचारां खातीर आपत्कालीन सेवां कडेन धाडली. दुसरे एके घडणुकेत, बीच मार्शलांनी चोरी केल्ली बॅग घेवन पळपी दोगांक धरून पोलिसांच्या ताब्यांत दिले. तशेंच बिहारची स वर्सा पिरायेचे शेणिल्ले चलयेक सोदून सुरक्षितपणान कुटुंबाच्या ताब्यांत दिली. तशेंच, दर्यादेगेर बीच मार्शलाक शेणिल्ली चांदीची सरपळी मेळ्ळी. ताचो धनी मेळूंक नाशिल्ले कारणान तांणी ती पुलिसां कडेन जमा केली. बाणावले दर्यादेगेर शेणिल्लो मोबायल फोन मेळिल्लो तो धनयाक परत दिलो.
पाळोळें दर्यादेगेर फ्रांसचो 65 वर्सा पिरायेचो विदेशी पर्यटक भोंवडे वेळार सकयल पडिल्ल्यान ताच्या मणक्याक दुखापत जाली. जीवरक्षकांनी स्पायन बोर्डाच्या आदारान तांकां थीर केले आनी फुडल्या उपचारां खातीर आपत्कालीन सेवां कडेन धाडले.
दूदसागर घसघशाचेर कोल्हापूरचो 28 वर्सा पिरायेचो एकलो लायफ जॅकेट घालिनासतना उदकांत गेल्या कारणान बुडपाक लागलो. जीवरक्षकांक ताका वाटोवपाक येस आयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
