भांगरभूंय | प्रतिनिधी
तपासाचो पुलीस म्हासंचालकां सयत मुख्यमंत्री घेतात नियाळ
भांगरभूंय । प्रतिनिधी
पणजी : हिंदू रक्षा समितीचो फुडारी गौतम खट्टराचो सोद घेवपा खातीर पुलिसांचो पंगड देहरादून गेला. थंय तो पुलिसांक मेळ्ळो ना. तो दिसलो काय पुलीस ताका अटक करून गोंयांत हाडटलें, अशें मुख्यमंत्री डॉ. प्रमोद सावंत हांणी सांगलें. ह्या गुन्यांवाचो तपास करपा विशीं सरकार गंभीर आसून म्हजे सयत पुलीस म्हासंचालक तपासाचो नियाळ घेतात, अशेंय तांणी सांगलें. लूक आऊट नोटीस जारी करपा सयत हेर सगळी कायदेशीर प्रक्रीया जातली.
वास्को परशुराम जयंतीचे कार्यावळींत भाशण करतना गौतम खट्टरान सेंट फ्रान्सीस झेवियरा विशीं आक्षेपार्ह वक्तव्य केलें. हाका लागून आमदार, मंत्र्यां सयत सगल्या धर्माच्या लोकां कडल्यान ताचेर कारवाय करपाची मागणी जाली. वास्को पुलिसांनी गुन्यांव नोंद करून तपास सुरू केलो. हेर पुलीस ठाण्यांनी लेगीत कागाळी नोंद जाल्ल्यान तपास गुन्यांव फांट्या कडेन दिवपाचो आदेश मंगळारा जारी जालो. ताका अटक करपा खातीर पुलिसांच्या पंगडान मंगळारा रातीं देहराडून हांगा ताच्या घरांत चवकशी केली. पुलिसांक तो थंय मेळूंक ना.
पुलीस ताचो सोद घेत आसा. खंय दिसतलो थंय ताका अटक करून गोंयांत हाडटलें. तपास जावन ताचेर कायदेशीर कारवाय जातली, अशें आस्वासन मुख्यमंत्री डॉ. सावंत हांणी दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
