भांगरभूंय | प्रतिनिधी
कोट्टायम: केरळच्या कोट्टायम जिल्ह्यांतलो काळजाक भिडपी लग्नाचो व्हिडियो सध्या सोशल मीडियावर गाजता. धर्मीय एकचाराची आनी मनिसपणाची एक देख म्हणून ह्या लग्ना कडे पळयतात. एका ख्रिस्ती पाद्रीन आपणें सांबाळून व्हड केल्ले एका हिंदू चलयेच्या लग्नांत तिचें ‘कन्यादान’ करून बापायचें कर्तव्य पार पाडलें.
फादर रॉय मॅथ्यू अशें ह्या पाद्रीचें नांव. पार्वती सामकें ल्हान आसतना, ताची आवय भायर पडली. तेन्ना सावन फादर मॅथ्यू हांच्या ‘बेथलेहम आश्रमांत’ तें ल्हानाचें व्हड जालें. फादरान ताचेर बापाय सारको मोग केलो, ताका शिक्षण दिलें आनी मार्गदर्शन केलें. इतलेंच न्हय तर कट्टापणा गांवांत रावपी अनंतू हाचे वांगडा तिचें लग्न जमोवपाकय फादरानूच फुडाकार घेतलो.
हें लग्न कोट्टायमच्या सेंट पॉल चर्चीत जालें, पूण लग्नाचे सगले विधी पार्वतीच्या परंपरे प्रमाण हिंदू पद्धतीन जाले. लग्नांतलो सगळ्यांत भावूक क्षण तेन्ना आयलो, जेन्ना फादर रॉय मॅथ्यू मुखार आयले आनी तांणी बापायच्या नात्यान पार्वतीचें ‘कन्यादान’ केलें. आपल्या मोगाचे चलयेक ताच्या सासरच्या हातांत सोंपयतना फादर रॉय हांचे दोळे लेगीत भरून आयले.
हो व्हिडियो व्हायरल जातकच लोकांनी फादरांच्या ह्या कार्याची तोखणाय केल्या. मोग, काळजी आनी नातीं हीं धर्मीय शिमेच्या पलतडचीं आसतात, हेंच हे घडणुकेन परतून एकदां सिद्ध केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
