भांगरभूंय | प्रतिनिधी
दुसरीं थोमणे मारतात म्हूण, आमी रागान वा तिडकीन वागलीं जाल्यार, आमी तसलेच अपरिपक्वतायेक बळी पडटलीं.
जिविताच्या दर एका पांवड्यार, आमी वेंचतात ताका आव्हानां आसात. तातूंतलें म्हत्वाचें आव्हान म्हळ्यार मनशां सांगाता जियेवंक शिकप. खास तरेन तांच्यो अपेक्षा, तांच्यो प्रतिक्रिया तांची उतरां आनी तांचें घायाळ जिवीत, हाचेर नियाळ करुंकूच जाय. तोखणाय, बगलांटां आनी थोमणें मारप, हेंवूय मनशाच्या जिवितांत आसा, ही सत्य स्थिती. तरी आसताना, आमी भायल्या गजालींचेरच भर दिवन जियेवंक जायना. मात्शें फुडें वचून, प्रमाणीकपणाचें जिवीत जियेवप शाणेपणाचें.
जिवितांत हेतू बाळगून जियेवप म्हळ्यारच प्रमाणीकपणान जियेवप. देवा मुखार आमी कोण, आमी कितें सत मानतात आनी आमी कशीं जियेतात, हाचो सुमेळ म्हळ्यार प्रमाणीकपणाचें जिवीत. असलें जिवीत जियेतात तेन्ना, दुसऱ्यांनी आमकां कितेंय म्हणूं, आमकां सोंपेपणीं, कांयच जावचें ना. पूण, प्रमाणीकपणाचें जिवीत ना जाल्यार, आमी कोणूय कितें म्हणटा वा कसलीय परिस्थिती उप्रासता ताका जाप दितल्याक आनी हे वरवीं आमचे वांटे जावंक वेळ नाका.
दीसपट्ट्या जिवितांत, आमकां मेळटलीं, वेगळे वेगळे तरेन वागणूक दाखयतात. आमचे सवें आशिल्लें बरेंपण मानून घेवन, थोडीं आमचीं, मना पसून तोखणाय करतात. दुसरीं, वेगळोच हेतू मनांत हाडून आमची तोखणाय करतात. थोडीं, नसायपणाक, असुरक्षीततायेक वा पुराय जावंक नाशिल्ल्या गरजांक लागून, बगलांटां घालतात. थोडीं, तांच्या जिवितांत आशिल्ल्या घायांक लागून तोंडाक येता तें उलयतात वा थोमणे मारतात. असल्यो प्रतिक्रिया, फक्त आमकांच लागून येतात, अशें न्हय, पूण तांच्या जिवितांत उप्रासतल्या संघर्शांक वा तांकां भोगतल्या कश्टांकूय लागून येवंक शकतात. जिवितांत थिराय सांबाळटलो जाल्यार हें समजून घेवंक जाय. आमची अस्मिताय, आमी तोखणायेचेर आदारिल्ली वा बांदिल्ली जाल्यार, तोखणायेची अपेक्षा धरून जियेवन, सत्य फाटीं दवरतले आनी आमच्या जिवितांतले दर एके घडयेक दुसऱ्यांचे मान्यतायेची अपेक्षा सोदतले. आमचें जिवीत, बगलांटांक चलोवंक दिलें जाल्यार, आमी आत्मविस्वास आनी जिविताची दिश्या सांडटले. दुसरीं थोमणे मारतात म्हूण, आमी रागान वा तिडकीन वागलीं जाल्यार, आमी तसलेच अपरिपक्वतायेक बळी पडटलीं. देखुनूच, आमी कोण, हाची वळख घेवन, सत कितें आनी सत कितें न्हय, हांचे मदीं विवेक करून जियेवप गरजेचें आनी सत कितें न्हय तें सोडून दिवन फुडलीं पावलां मारप शाणेपणाचें.
हें सगलें समजून घेवंक, आमकां खोल जाणटिकाय जाय. दुसरीं अपरिपक्वतायेन वागतात म्हूण, आमीय अपरिपक्वतायेचीं जावंक जायना. जिवितांत आयिल्ले परिस्थितीक आमी बरे तरेन जाप दिवप शाणेपणाचें, चाळोवंक वा हल्लो करुंक जायनां. दुसरीं काचाबूल जातात तेन्ना, आमी शांतताय सांबाळप म्हत्वाचें. दुसरीं घुस्पागोंदळ करतात तेन्ना, आमी खात्रेन जियेवंक जाय. तशेंच परिस्थितींत, आमी थिरायेन जियेल्यार आमकांच बरें. हें सगलें आपले आपूण जायनां, ताका मनाची शिस्त आनी सातत्यान आमची वाड जाय.
कांय मनशां सांगाता जियेवप म्हळ्यार खऱ्यांनीच एक आव्हान. तांचीं उतरां आमच्या काळजाक तोंपतलीं, तांचीं कर्तुबां आमकां अस्वस्थ करतलीं आनी तांणी आपणायिल्ल्यो वृत्ती आमकां नाका पुरो करतल्यो. तरी आसतना, ह्यो परिस्थिती आमकां शिकपाच्यो घडी जावंक शकतात. त्यो आमकां सोंसणीकाय शिकयतात, आमकां आशिल्ल्या मनशाच्या अशक्यताये विशिंची समजणी खोलायतात, आनी सहन करपाची शक्ती वाडयतात. आमी दुसऱ्यां कडेन दवरिल्ले संबंद, फक्त आमकां समाधान दिवपीच आसनात, पूण आमची आकारणी करतात.
तेच बराबर, प्रमाणीक जिवीत जियेवप म्हळ्यार, तोंड बंद करून सगलें सोंसून घेवप न्हय. आमी फावो त्या प्रमाणांत आमची वागणूक दाखोवंक जाय. दुसऱ्यांचें घायाळ जाल्लें जिवीत समजून घेवप म्हळ्यार आमकां दुख्ख दिवंक वा मान-रेस्पेत नां दिवंक परवानगी दिवप न्हय. परिपक्वतायेक दयाळाय जाय तशेंच थीरताय गरजेची. केन्ना आमी उलोवंक जाय, केन्ना फाटीं सरुंक जाय आनी केन्ना ओगी रावंक जाय, तें आमी जाणां जावप म्हत्वाचें.
हे तरेन जियेवंक, आमकां भितरल्या मनाची मेकळिकाय गरजेची. आमकां कितें भोगता ताचेर निर्णय घेवचे परस, सता परमाणें निर्णय घेवप गरजेचो. आमची कोणेंय टिका केली वा आमकां वाखाणलीं म्हूण आमी बेश्टेच फुलोंक जायना. आमची अस्मिताय, देवाचेर आदारिल्ली आसता तेन्ना, असले तरेच्या मेकळेपणांत वाड जाता. दुसऱ्यांच्या बदलत्या लोकमतांचेर आमकां आशिल्ल्या मेकळेपणाची वाड जावंकूच शकना. असले तरेच्या जियेवपांत, भायल्यो वस्तू आमचेर शेक गाजोवंक शकनात.
जिविताची यात्रा करतना, लोकांच्यो प्रतिक्रिया वाटावंक जायनात. पूण, तांकां कसलो जबाब दिवचो, तें आमी वेंचतात. काळजा -मनाचो एकवट, परिपक्वताय आनी मेकळेपण, हाचेर भर दिवन, मनशाच्या घुस्पागोंदळांत आमी खोलाय, स्थिरताय, स्पश्टताय, घटाय आनी शांतताय सांबाळपी जावन जियेवप शाणेपणाचें.
जॉन एम्. आल्फोंसो, कार्मेलीत
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
