भांगरभूंय | प्रतिनिधी
मुख्यमंत्री: वेंचणुकेंत लोकांनी काँग्रेसीची सुवात दाखोवची
पणजेंत भाजपा वतीन बायलांचो निशेध मोर्चा
पणजी: प्रधानमंत्री नरेंद्र मोदी हांच्या फुडारपणा खाला भाजप सरकारान बायलांच्या विकासा खातीर खूबश्यो कल्याणकारी येवजण्यो सुरू केल्यात. बायलांक हक्काचें स्थान दिवपा खातीर हाडिल्ली नारी शक्ती वंदन अधिनेमाक विरोध करपी काँग्रेस ही बायलां विरोधी न्हय जाल्यार अराष्ट्रीय आसा. बायलांचो अपमान करपी काँग्रेसीक येता ते वेंचणुकेंत लोकांनी तांची सुवात दाखोवंक जाय अशें आवाहन मुख्यमंत्री डॉ. प्रमोद सावंत हांणी केलें.
लोकसभेंत नारी शक्ती वंदन अधिनेम विधेयक हारले उपरांत भाजपा वतीन काल पणजेंत निशेध मोर्चा काडलो. आमदार देविया राणे, आमदार डिलायला लोबो हांचे सयत शेंकड्यांनी बायलांनी ह्या निशेध मोर्चांत वांटो घेतलो. ‘हाय हाय, काँग्रेस पार्टी हाय हाय, मुर्दाबाद, मुर्दाबाद, काँग्रेस मुर्दाबाद’ अश्यो घोशणा दिवन बायलांनी वातावरण तापोवन सोडलें. पणजे काँग्रेस हावजा भायर घोशणा दिवन निशेध केलो.
महिला आरक्षणाकूच न्हय जाल्यार सरकाराच्या बऱ्या उपक्रमाक काँग्रेसीन सेगीत विरोध केला. हें विधेयक संमत जाल्लें जाल्यार गोंय विधानसभेंत 13 बायलो आमदार जातल्यो आशिल्ल्यो. लोकसभेंतूय हेर राज्यां बराबर गोंयांतल्या खासदारांचो आंकडो वाडपाचो. गृह आदारा सयत सगल्यो कल्याणकारी येवजण्यो भाजप सरकारान सुरू केल्यात. येता ते वेंचणुकेंत भाजपाच्या बायलां कार्यकर्त्यांनी काँग्रेसीचो बायलां विरोध सगल्यां मेरेन पावोवंक जाय अशें मुख्यमंत्री डॉ. प्रमोद सावंत हांणी सांगलें.
प्रदेश अध्यक्ष दामू नायक, आमदार देविया राणे हांचींय उलोवपां ह्या वेळार जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
