भांगरभूंय | प्रतिनिधी
पणजीः काँग्रेसीचो बायलां आरक्षणाक इल्लो पसून विरोध ना. पूण सरकारान सगल्यांत पयलीं जातीनिहाय जनगणना करची आनी हे जनगणनेच्या आदाराचेर बायलां आरक्षण लागू करचें, अशी मागणी काँग्रेसीची गोंय प्रभारी डाॅ. अंजली निंबाळकर हांणी केल्या.
पणजे काँग्रेस हावजांत आपयिल्ले पत्रकार परिशदेंत ती उलयताली. ह्या वेळार काँग्रेशीचे उपाध्यक्ष सुनील कवठणकार आनी वरीश्ठ फुडारी एम. के. शेख हजर आशिल्ले.
बायलांनी भारताक दिल्ल्या योगदाना खातीर तिका सन्मानीत करपा खातीर सरकार आरक्षण दिवपाक सोदता. मात हो सन्मान सद्याचे परिस्थितींत न्हय तर लोकसभेची सिटां ५४३ सावन ८५० मेरेन सिटां वाडयले उपरांतूच दिवपाक सोदता, अशें डाॅ. निंबाळकर हांणी सांगलें.
ज्या विधेयकांत तुमी बायलां खातीर आरक्षण दिवपाक सोदतात जाल्यार अस्तित्वांत आशिल्लीं ५४३ सिटां आसात, तातूंत भितर तुमी आरक्षण कित्याक दिनात असो स्पश्ट, सादो मुद्दो विरोधी पक्ष फुडारी राहूल गांधी हांणी लोकसभेंत आनी अध्यक्ष मल्लिकार्जून खर्गे राज्यसभेंत मांडिल्लो.
मात सरकाराक भारताचे शिमे बरोबर गुड्डलसांव करपाक जाय. फेररचणुकेच्या नांवान शिमो आपल्याक फायद्याच्यो थारतात, तश्यो आखून आपल्या मतांच्या हिशेबान २०२९त वेंचणुको करपाक जाय. जर हांकां बायलांचो खर्यांनीच आदर आसा २०२३ तलें विधेयक लागू करून हें आरक्षण ५४३ सिटां भितर आसपावन घेवचें. मागीर तें संमत करपाक सगळे विरोधक तयार आसतले, अशे आव्हान निंबाळकर हांणी दिलें.
एसी एसटी आरक्षण आसा ते जातीनिहाय जनगणने प्रमाण बेगीनचे बेगीन लागू करचें. २०२९त जर तुमकां आरक्षण लागू करपाक जाय जाल्यार जातीनिहाय जनगणने प्रमाण ते अंमलात येवप गरजेचें. घरांची जनगणनेंत घरच्या नाम्या सयत तुमचें नांव आनी जातीची नोंदणी लेगीत जाता ते खातीर वेगळे सर्वेक्षण करपाची गरज ना, असो सल्लो निंबाळकर हांणी दिलो.
जर प्रधानमंत्री नरेंद्र मोदी आनी अमित शहा हांणी हें काना-मनार घेतलें जाल्यार तीन चार म्हयन्यां भितर जातीनिहाय जनगणने प्रमाण सगल्या बायलां खातीर न्याय मेळपाची प्रक्रीया पुराय जातली. मात तांकां बायलां खातीर हें करपाची इत्सा ना, असो आरोप निंबाळकर हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
