भांगरभूंय | प्रतिनिधी
पणजी : शिरगांवां श्री लयराई देवीचे जात्रेक आयज भक्तीवान सुरवात जाली. हजारांनी व्रतस्त धोंड, भावीक आयज देवीच्या पांयां कडेन येतले. हे जात्रेक जावपी भाविकांची गर्दी लक्षांत घेवन श्री लयराई संस्थान समिती आनी प्रशासन नेटान तयारेक लागल्या.
फाटल्या वर्सा हे जात्रेक खेटाखेट जावन बरीच व्हड घडणीक घडिल्ली. हे फाटभूंयेर अंदूं अदीक जतनाय घेतल्या. धोंड, भाविकांनीय संस्थान समिती, प्रशासनान जारी केल्ल्यो सुचवण्यो पाळून श्री लयराई देवीचे दर्शन घेवचें आनी प्रशासनाक सहकार्य करचें, असो उलो मारला. मुख्यमंत्री डॉ. प्रमोद सावंत हांणी आयज सकाळीं शिरगांवां वचून श्री लयराई देवीचें दर्शन घेतलें. तशेंच हाजीर आशिल्ल्या अधिकार्यांकडल्यान आनी देवस्थान समितीकडल्यान सगलीं सुरक्षा यंत्रणां, तयारी हाची म्हायती घेतली आनी गरजेच्यो सुचवण्यो केल्यो.
सीसीटीव्ही कॅमेरे
शिरगांवां आयज २१ एप्रिलाक जात्रेक धोंड तशेंच भाविकांच्या सोयी खातीर मान्यताय मेळिल्ल्या स्टॉल सयत ह्या वाठारांत आशिल्लीं सदचीं च्याचीं दुकानां चालूच उरतलीं. निर्बंधां मदीं मात्शें मेकळेपण हाडपी आदेश जारी केला. जात्रेक कायदो आनी सुवेवस्था सांबाळपा खातीर ९०० पुलीस कर्मचारी, ३०० परस चड सरकारी अधिकारी, उजो पालोवपी दळ तैनात केल्यात. देवूळ आनी वाठारांत ९४ सीसीटीव्ही कॅमेरे बसयल्यात. ताका लागून गर्देचेर बारीक लक्ष दवरपाक पुलिसांक बऱ्याक पडटलें.
सोऱ्याचे बार बंद
जात्रेचे फाटभूंयेर उत्तर गोंय जिल्लोधिकारी अंकित यादव हांणी शिरगांव वाठारांतल्या मुळगांव, मयां, खोर्जुव्यां, अस्नोड्यां गांवचीं सोरो विकपाचीं दुकानां थारावीक काळा खातीर बंद दवरतले. २० ते २२ एप्रील दनपरां १२ वरां मेरेन ही बंदी लागू आसतली.
मजगतीं, सगल्यांनी शिस्त पाळून, बोवाळ, धक्काबुक्की करिनासतना शांतिकायेन देवदर्शन घेवचें. कोणाकूच त्रास जावचे ना हाची जतनाय घेवची, असो उलो श्री लईराई संस्थान समिती आनी मुख्यंमत्री डॉ. सावंत हांणी मारलो.
#Goa #Shirgao #ShreeLairaiDevi #Lairai #ShirgaoJatra
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
