भांगरभूंय | प्रतिनिधी
भारतांत काळजाचें दुयेंस आशिल्ल्या दुयेतींचो आंकडो दिसान दीस वाडत आसा. काळजाच्या दुयेंसांविशीं चुकीच्या समजुतींक लागून जायते जाण वेळार उपचार घेनात. कांय दुयेंती दोतोराचो सल्लो घेवन लेगीत बायपास शस्त्रक्रिया टाळटात. खरें म्हणल्यार ही शस्त्रक्रिया खूब म्हत्वाची आशिल्ल्यान गरज पडल्यार तज्ञांच्या मार्गदर्शना खाला ती करप गरजेचें आसता.
भारतांत काळजाचें दुयेंस हें मरण येवपाचें एक मुखेल कारण. जाण्ट्यांकच न्हय तर तरणाट्यांकय ताचो परिणाम जाता. बेकार जिणे पद्दत, चुकीची खावपाची संवय, ताण, स्थूलताय, गोडेंमूत, उच्च रक्तदाब आनी आनुवंशिकतायेक लागून काळजाच्या दुयेंसांचो धोको वाडटा. कोरोनरी आर्टरी डिजीज, काळजाचो आताक, काळजाचें दुयेंस आनी एरिथमिया (काळजाचो ताल अनियमीत) हीं चड प्रमाणांत दिसपी दुयेंसां. तातूंत छाती दुखप वा अस्वस्थताय, उस्वास घेवप, थकप, हात, मान वा फाट दुखप, घाम येवप, कलकलप आनी घुंवळ येवप हांचो आसपाव जाता.
छातयेंत दुखप वा उस्वास घेवपाक त्रास जावप अशे तरेच्या लक्षणां कडेन जायते जाण आडनदर करतात, हाका लागून उपचाराक कळाव जाता. म्हूण काळजाचो आताक वा काळजाचें दुयेंस ह्या भोंवर्यांत सांपडप जाता. बायपास शस्त्रक्रिया करपाक जायते जाण भियेतात. पूण ह्या प्रगत उपचारा विशीं जागृताय निर्माण करपाची गरज आसा, कारण ताका लागून दुयेंतींचे परिणाम सुदारतात आनी तांकां मरणूय येवपाचो आंकडो उणो जाता.
बायपास शस्त्रक्रिया कित्याक करची?
बायपास शस्त्रक्रिया, जाका कोरोनरी आर्टरी बायपास ग्राफ्टिंग अशेंय म्हण्टात, ही जीव वाटावपी पद्दत आसा. तातूंत आडखळिल्लीं धमनी बायपास करून काळजांत रगत प्रवाह परतून हाडप हांचो आस्पाव जाता. हृदयविकाराचे दोतोर खर आडखळ आयल्यार ही शस्त्रक्रिया करपाची सुचवणी करतात आनी ताका लागून परत परत काळजाचो आताक येना.
आधुनीक वैजकी तंत्रगिन्यान ही शस्त्रक्रिया सुरक्षीत आनी प्रभावी करपाक लागल्या. ताका लागून काळजाची भलायकी सुदारता आनी दुयेंतींक आपलें दिसपट्टें जिवीत सहजतायेन सुरू करपाक मेळटा. योग्य जतनाय, नेमान तपासणी आनी सक्रिय जिणे पद्दतीन दुयेंती १५ ते २० वर्सां भलायकेन जियेवंक शकता.
कोरोनरी आर्टरी डिजीज आशिल्ल्या दुयेंतींक वखदां वा स्टॅटींग घालूनय बरें दिसना तांकां बायपास करपाची सुचवणी करतात. तशेंच गोडेंमूत आशिल्ल्या आनी काळजाक लागून सेगीत समस्या निर्माण जावपी दुयेंती खातीरय उपेगी पडटा.
दरेकल्यान आपल्या काळजाचे भलायकेक प्राधान्य दिवपाची गरज आसा. दोतोरान बायपास शस्त्रक्रिया करपाची शिफारस केल्यार ती टाळची न्हय. तुमच्या दुबावाचेर तज्ञां कडेन चर्चा करात. दुयेंती आनी तांच्या कुटुंबांक बरी म्हायती मेळ्ळी आनी भलायकेचो बरो निर्णय घेतल्यार काळजाची राखण निश्चीतपणान करूं येता.
#HealthNews #HeartAttack #Bypass #Surgery #HeartDisease
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
