भांगरभूंय | प्रतिनिधी
कुर्टी- खांडेपार पंचायतीच्या आदल्या कर्मचाऱ्या कडल्यान लाखांनी रुपयांची अफरातफर
फोंडें: कुर्टी- खांडेपार पंचायतीच्या एका आदल्या कर्मचाऱ्यान बनावट सय आनी शिक्क्यांचो वापर करून लाखांनी रुपयांची अफरातफर केल्ल्याचो धक्को दिवपी प्रकार उक्तडार आयला. ह्या प्रकरणांत फोंडें पुलिसांनी दुबावीत योगेश गावडे (रा. ओपा- खांडेपार) हाका ताब्यांत घेतला. विशेश म्हणल्यार दुबाविताचें लग्न थारिल्लें. ताचे पयलींच ताका पुलीस कोठयेंत वच्चें पडिल्ल्यान वाठारांत मोटी चर्चा सुरू आसा.
फाटल्या शेनवारा एक बायल उत्पन्नाचो दाखलो घेवपा खातीर पंचायत कचेरेंत आयिल्ली. तिणें घरपटी भरिल्ल्याची 8,500 रुपयांची पावती सादर केली. पूण पंचायत कचेरेंत ह्या रकमेची कसलीच नोंद नाशिल्ल्याचें कर्मचाऱ्यांचे नदरेक आयलें. ही बायल दुबावीत योगेशाच्या शेजाराच आशिल्ली.
पावते वेली सरपंचाची सय बनावट आशिल्ल्याचें स्पश्ट जातकच पंचायत सचीव आनी सरपंचान ताकतिकेन चवकशी केली आनी सोमारा पुलिशेंत रितसर कागाळ दाखल केली.
मेळिल्ले म्हायती प्रमाण सप्टेंबर 2025तय योगेशान 28 हजार रुपयांची बनावट पावती दिल्ल्याचो प्रकार उक्तडार आयिल्लो. त्यावेळार ताणें आपली चूक कबूल केल्ल्यान पुलिसांनी गुन्यांव नोंद करपा बदला ताका नोकरे वेल्यान काडून उडयिल्लो. पूण नोकरी गेले उपरांतूय ताणें लोकां कडल्यान पयशे घेवन बनावट पावत्यो आनी दाखले दिवपाचो धंदो सुरूच दवरिल्ल्याचें आतां स्पश्ट जालां.
सरपंच नावेद तहसीलदार हांणी दिल्ले म्हायती प्रमाण, दुबावितान फक्त पावत्योच न्हय जाल्यार बनावट जल्म दाखलेय तयार करून दिल्यात. हाचेर पंचायतीचो बनावट शिक्को आनी सचिवाची फटीची सय आसा. धक्को दिवपी गजाल म्हणल्यार हें बनावट जल्म दाखले पुर्तुगेज पासपोर्ट मेळोवपा खातीर वापरल्यात. दुबावितान बनावट पावती पुस्तकाचोय वापर केल्ल्याची शक्यताय आसून पुलीस ते दिकेन तपास करतात.
मजगतीं, पुलिसांनी ताब्यांत घेतिल्ल्या दुबावितान अशे तरेन कितल्या जाणांची फटवणूक केल्या हाचो तपास सुरू आसा. कांय वर्सां पयलीं किर्लपाल पंचायतींतूय असोच प्रकार घडिल्लो. अशा प्रकरणां मदीं खर कारवाय जावपा बदला खूबशे फावटी दुबावितांक राजकी आलाशिरो मेळत आशिल्ल्याची चर्चा आतां लोक करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
