भांगरभूंय | प्रतिनिधी
वाळपय: वाळपय नगरपालिका वाठारांतले मुखेल बाजारपेठेंत फाटल्या कांय वर्सां सावन सेगीत निर्माण जावपी येरादारीची कोंयडी सोडोवपा खातीर कसलींच पावलां उबारिल्लीं नात. हे खातीर सर्वसामान्य लोकांक व्हड प्रमाणांत त्रास सोंसचो पडटा. कांय वाहन चालक मनमानीपणान जाय थंय आपलीं वाहनां पार्क करतात. हे खातीर येरादारीचेर विपरीत परिणाम जावन सेगीत कोंयडी जायत आसता. हे फाटभुंयेर संबंदीत सरकारी यंत्रणां पुरायपणान निश्क्रीय थारत आशिल्ल्याचो आरोप लोकां कडल्यान जायत आसा.
वाळपय नगरपालिका मंडळा कडल्यान फाटल्या पांच वर्सांत येरादारी कोंयडेचे समस्येचेर कसलीच उपाय येवजण करूंक नाशिल्ल्यान लोकां मदीं खर निरशेवणी पातळ्ळ्या. येरादारी कोंयडेचो प्रस्न सोडयतलो कोण? असो प्रस्न लोकांनी उपस्थीत केला.
मेळिल्ले म्हायती प्रमाण सत्तरी म्हालांतली मुखेल बाजारपेठ म्हूण वळखतल्या वाळपय शारांत फाटल्या कांय वर्सां सावन येरादारी कोंयडेची समस्या गंभीर जाल्या. शारांत वेगळ्यो वेगळ्यो सरकारी कचेऱ्यो आसात. बँको, शाळा आनी हेर अस्थापनां आसात. गांवगिऱ्या वाठारांतले लोक व्हड प्रमाणांत हांगा येत आसतात. चड करून सकाळीं आनी दनपारच्या वेळार वाहनांची गर्दी वाडिल्ल्यान येरादारी कोंयडेचो प्रस्न उप्रासता.
येता त्या काळांत ही समस्या आनीक गंभीर जावपाची शक्यताय आसून नियोजीत पार्कींग वेवस्था लागू केले बगर येरादारी कोंयडी सुटप कठीण आसा अशें पालक आनी नागरिकांचें मत आसा. विद्यार्थ्यांचे सुरक्षीततायेकूय घात निर्माण जायत आशिल्ल्यान प्रशासनान हे समस्येची गंभीरतायेन दखल घेवन रोखड्या रोखडी उपाय येवजण करची अशी मागणी नेट धरीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
