भांगरभूंय | प्रतिनिधी
पणजी : सेंट फ्रान्सिस झेवियर हांचे विशीं आक्षेपार्ह विधान करपी गौतम खट्टर हाचेर कायद्या प्रमाण खर कारवाय करतले, अशें मुख्यमंत्री डॉ. प्रमोद सावंत हांणी स्पश्ट केलां. वास्कोच्या भगवान परशुराम जल्मोत्सव कार्यावळंत जाल्ल्या ह्या वादाच्या प्रकार उपरांत पुराय गोंयांत तिडकीचें वातावरण आसा, मुख्यमंत्र्यांनी सध्या ह्या प्रकरणाची खर दखल घेतल्या.
मुख्यमंत्री डॉ. सावंत हांणी सांगलें, गोंयच्या भायल्या लोकांनी येवन, राज्यांतलो धर्मीक एकचार इबाडटलो अशीं विधानां करचीं न्हय. आयोजकांनी अशे तरेच्या कार्यावळींचें आयोजन करतना वक्त्यांक पयलींच योग्य समज दिवप गरजेचें. ह्या प्रकरणांत आमी एफआयआर नोंद केल्या. दुबाविताचेर खर कारवाय करतले. माचयेवेल्या आमदारांनी वक्त्याक थंयच आडावपाक जाय आशिल्लें. मात बेगोबेग तशें करप कांय फावटीं शक्य नासता, अशेंय मत तांणी उक्तायलें.
दुसरे कडेन ह्या प्रकरणाचे पडसाद कायदेशीर पातळेरूय दिसून येतात. हळदोणाचे कॉंग्रेस आमदार अॅड. कार्लुस फेरेरा हांणीय वास्को पुलीस स्टेशनांत गौतम खट्टरा आड कागाळ दाखल केल्या. पुलिसांनी दुबाविता आड भारतीय न्याय संहिताच्या कलम २९९ आनी १९६ खाला गुन्यांव नोंद केला. पीटर डिसोझा हांणी काल दिल्ले कागाळी उपरांत आतां राजकीय फुडार्यां कडल्यानूय कागाळीं येवप चालूच आसा. खट्टर हाका बेगोबेग अटक करपाचे मागणेक नेट आयला.
GautamKhattar #goa #abuse #Stxavier #konkani #vasco
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
