भांगरभूंय | प्रतिनिधी
पणजी : सेंट फ्रान्सिस झेवियर हांचे विशीं आक्षेपार्ह विधान करून क्रिस्तांव समाजाच्यो भावना दुखयिल्ल्या प्रकरणांत वास्को पुलिसांनी दुबावीत गौतम खट्टर हाचे आड गुन्यांव दाखल केला. १८ एप्रिलाक वास्कोच्या टिळक मैदानाचेर आयोजीत ‘भगवान परशुराम जन्मोत्सव’ कार्यावळी वेळार ताणें हें विधान केल्लें. ही घडणूक उक्तडार आयले उपरांत पुराय गोंयांत तिडकीचें वातावरण निर्माण जालें. कारण खट्टरान वापरिल्लीं उतरां सामकीं हरकत घेवपा सारकीं आसलीं.
क्रिस्तांव भावांच्यो धर्मीक भावना दुखावल्ल्याचो आरोप करीत समाजीक कार्यकर्ते आनी कुठ्ठाळेचे कॉंग्रेस फुडारी पीटर डिसोझा हांणी दिल्ले कागाळीच्या आदारार पुलिसांनी १९ एप्रिलाक रातच्या ११:१८ वरांचेर एफआयआर नोंद केली.
ह्या प्रकरणांत पुलिसांनी भारतीय न्याय संहिता २०२३ च्या कलम २९९ आनी १९६ खाला गुन्यांव नोंद केला. दुबावितान मुद्दम आनी विद्वेशपूर्ण भावनेने टिप्पणी करून दोन समुदायां मदीं वांकडेपण निर्माण करपाचो यत्न केल्ल्याचें कागाळींत नमूद आसा. हे घडणुकेचे पडसाद राजकी पांवड्यारूय दिसून आयल्यात. पीटर डिसोझा हांणी घडणुकेचेर खर टिका करतना म्हणलां, मंत्री मॉविन गुदिन्हो आनी हेर आमदारांचे हाजेरींत भौशीक कार्यावळींत अशे तरेचीं विधानां जावप ही सामकी लजेची गजाल. तांणी फकत वक्त्याचेरूच न्हय तर आयोजक आनी हाजीर आशिल्ल्या फुडार्यांचेरूय जापसालदारी निश्चीत करपाची मागणी केली.
आयोजकांनी मागली जाहीर माफी
दुसरे कडेन वास्कोच्या परशुराम जयंती उत्सवाच्या आयोजकांनी पत्रकार परिशद घेवन आपली भुमिका स्पश्ट केली. सेंट फ्रान्सिस झेवियर हांचे विशीं वापरिल्ले शब्द दुर्दैवी आशिल्ल्या, तांणी अशें उलोवपाक चालू करतांच ताका रोखडेंच आडायिल्लो, असो दावो आयोजकांनी केला. हे घडणुके विशीं दुख्ख उक्तायत जांच्यो भावना दुखावल्यात, तांची आयोजकांनी चूक मागल्या. तरी गोंयच्या विवीध राजकीय पक्षांनी ह्या प्रकरणावेल्यान सरकाराक धारेर धरलां.
फुडाऱ्यांची मागणी
विरोधी पक्ष फुडारी युरी आलेमाव हे घडणुकेचो खर विरोध केलो. गौतम खट्टर हांणी ‘गोंयचो सायब’ हाचो अपमान करून गोंयकारांच्यो धर्मीक भावना दुखावल्या. मुख्यमंत्री डॉ. प्रमोद सावंत रोखडीच कारवाय करून तांकां अटक करची आनी तांचेर गोंयांत येवपाक बंदी घालची, अशी मागणी आलेमाव हांणी केल्या. प्रदेश कॉंग्रेस अध्यक्ष अमित पाटकार हांणीय ह्या विधानाचो निशेध करीत म्हणलें, असल्या संवेदनशील विधानांक लागून गोंयांत कितल्याशाच काळा सावन चलत आयिल्ल्या धर्मीक एकवटाक धोको निर्माण जाला. फकत तो मनीसूच न्हय, मंचाचेर हाजीर आशिल्ले फुडारीय हाका जापसालदार आशिल्ल्याचें तांणी स्पश्ट केलें.
वादाचो विस्तार
आमदार एल्टन डिकोस्टा हांणी ह्या वादाचो विस्तार पणजी मेरेन जाल्ल्याचें निदर्शनाक हाडून दिलें. आयतारा पणजेचे एके कार्यावळींत जनशिक्षण संस्थेचे संचालक श्रीहरी आठले हांणीय सेंट फ्रान्सिस झेवियर हांचो अपमान केल्ल्याचो आरोप डिकोस्टा हांणी केला. हें सगलें खंय थारतलें? असो प्रस्न तांणी हाजीर केलो. जाल्यार, हळदोणाचे आमदार ऍड. कार्लुस फेरेरा हांणी पुलिसांक ‘सुओ-मोटो’ दखल घेवन खट्टर हांकां अटक करपाचो उलो मारला. वेंचणुकेच्या काळांत अशे तरेन मतांचें ध्रुवीकरण करपा खातीर धर्मीक थळांचो अपमान करपाचे वा वाकडेपण निर्माण करपाचे यत्न जावपाक शकतात. हे विशी गोंयकारांनी शिटूक रावचें असोय उलो तांणी मारलो.
आपा कडल्यान पुलिसांक पत्र
आम आदमी पार्टीचे (आप) गोवा प्रदेशाध्यक्ष वाल्मिकी नायक हांणीय पुलीस महासंचालक आलोक कुमार हांकां पत्र बरोवन गौतम खट्टर हांचेर खर कारवायेची मागणी केल्या. भाजप मंत्री आनी आमदारांचे हाजेरींत अशीं विधानां जावप हे धर्मीक एकवट इबाडपा खातीर मुद्दम केल्ले यत्न आसात, अशें नायक हांणी पत्रांत नमूद केलां. गोंयचे शांत समाजीक रचणुकेंत आडमेळीं हाडपी खंयच्याच यत्नांक कळाव करिनासतना खर जाप दिवप सामकी गरजेची आशिल्ल्याचें तांणी म्हणलें. ह्या प्रकरणाचो फुडलो तपास पुलीस निरीक्षक वैभव धनंजय नायक हांच्या मार्गदर्शना खाला सुरू आशिल्ल्यान आतां पुराय राज्याचें लक्ष पुलिसांचे फुडले कारवाये कडेन लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
