भांगरभूंय | प्रतिनिधी
पणजी: लोकसभा वेंचणुकेचे फाटभूंयेर राजकीय वातावरण तापलां. मुख्यमंत्री डॉ. प्रमोद सावंत हांणी कॉंग्रेस पक्षाचेर सामक्या गंभीर शब्दांनी टिका केल्या. कॉंग्रेस हो एक देशविरोधी (अँटी-नॅशनल) पक्ष. जांणी देशांतल्या ७० कोटी बायलांक फटयल्यां तें म्हळ्यार कॉंग्रेस पक्ष आनी तांच्या इश्ट पक्षांनी. असो आरोप मुख्यमंत्र्यांनी केलो. पणजेच्या भाजप कार्यालयांत आयोजीत पत्रकार परिशदेंत ते उलयताले.
प्रधानमंत्री नरेंद्र मोदी हांच्या नेतृत्वा खाला सरकारान बायलां सक्षमीकरणा खातीर इतिहासीक पावलां उखल्ल्यांत, अशें म्हणीत मुख्यमंत्र्यांनी कॉंग्रेसीच्या कार्य पद्दतीचेर प्रस्न केलो. तांणी म्हणलें, कॉंग्रेसीन देशाक बायब प्रधानमंत्री दिली, मात कितलींशींच वर्सां सत्तेंत रावूनय ते बायलांक संसदेंत आरक्षण दिवपाक पावले ना. ही बायलां शक्तीची व्हड प्रतारणा. मोदी सरकारान बायलां आरक्षण विधेयक मंजूर करून बायालांक तांचो हक्क मेळोवन दिलो, अशेंय तांणी ह्या वेळार नमूद केलें.
मुख्यमंत्री सावंत हांणी कॉंग्रेसींतल्या बायलां फुडार्यांकूय ह्या मुद्द्यावेल्यान धारेर धरलीं. कॉंग्रेसींतल्या बायलां फुडार्यांने आपल्या पक्ष नेतृत्वाक जाप विचारपाक जाय आनी तांचे कडल्यान जाप मागूंक जाय, असो उलो तांणी मारलो. कॉंग्रेसीच्या काळांत बायलांच्या प्रस्ना कडेन फकत आडनदर केली, असो दावो करीत तांणी येवपी वेंचणुकेंत जनतेन विचार करून कौल दिवचें असो उलो मारलो.
हे पत्रकार परिशदे वरवीं मुख्यमंत्र्यांनी भारतीय जनता पक्षाचें महिला धोरण आनी कॉंग्रेसीच्या ’अन्याय’कारक इतिहासाचेर उजो घालीत मतदारांक साद घाली. कॉंग्रेसीन फकत आस्वासनां दिलीं, मात प्रत्यक्षांत बायलांच्या सक्षमीकरणा खातीर भाजपानूच काम केलें, हो संदेश तांणी माध्यमांतल्या पावयलो.
भाजपचे गोवा प्रदेशाध्यक्ष दामू नायक हांणी विरोधी पक्षांचेर बायलां सक्षमीकरणाच्या मुद्द्यावेल्या टिका केली. बायलां आरक्षण विधेयकाक (नारी शक्ती वंदन अधिनियम) विरोध करून विरोधकांनी बायलांचे उदरगतींत आडमेळीं हाडल्यां. हो तांचो विस्वासघात आशिल्ल्याचें तांणी म्हणलें. कॉंग्रेसीन ह्यान पयलींय असल्या कायद्यांक विरोध करून बायलां सक्षमीकरणाच्या आडूच भुमिका घेतिल्ल्याचें नायक हांणी ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
