भांगरभूंय | प्रतिनिधी
पणजी : कुडचडें-सांवड्डेंच्या महामार्गावेल्या जुवारी पुला लागसार शेनवारा अल्टो आनी वॅगनार ह्या दोन मोटारीं मदीं अपघात जालो. तातूंत एकलो गंभीर जखमी जाल्ल्यान, ताका रोखडोच हॉस्पिटलांत दाखल केलो. ह्या भागांतलो हो अपघातांचो ब्लॅकस्पॉट. मात हांगा कसलेच तरेचो सुचोवणी तक्टो लावंक ना. हांगा सेगीत जावपी अपघातांक लागून नागरिकांनी तिडक उक्तायल्या.
ह्या अपघाताची म्हायती मेळटांच थळाव्यांनी घडणुके सुवातेर गर्दी केली. जुवारी पुलाज लागसारचो हो रस्तो सामको धोक्याचो जाला. हांगा सेगीत अपघाता जातात अशें हांगचे थळावे म्हणटात. इबाडिल्ले रस्ते, रस्त्यांचेर पडिल्लीं फोंडकुलां आनी कसलेच तरेचे सुचवणी तखटे नाशिल्ल्यान वाहन चालक घुस्पतात. हाचो शेवट मागीर अपघातांत जाता. मुखेल महामार्ग आनी कामो गांवाकडेन वचपी जाणारा जोड रस्तो, ह्या दोनूय सुवातांचेर सुरक्षिततायेचो उणाव आशिल्ल्याचें ग्रामस्थांनी निदर्शनाक हाडून दिलें.
सेगीत जावपी ह्या अपघातां उपरांतूय प्रशासन ओगी आशिल्ल्याची टिका थळाव्यांनी केल्या. संबंदीत प्राधिकरणान बेगोबेग ह्या रस्त्याची दुरुस्ती करची, स्पिटब्रेकर बसोवचे आनी सुचवणी तक्टे लावचे, अशी मागणी जाता. फुडाराक भिरांकूळ अपघात जावचे न्हय म्हूण येरादारी वेवस्थापन अदीक खर करपाची गरज आशिल्ल्याचेंय थळाव्यांनी स्पश्ट केलें. महामार्गावेल्या ह्या वाडिल्ल्या अपघातांक लागून प्रवाशांचे सुरक्षेचो गंभीर प्रस्न निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
